Rafiq Manaflı
Dünən daha 4 cəbhəçi həbs olundu. Rejim həbslər üçün daha heç bəhanə də axtarmır. Bunlar axı dövlət qulluqçuları deyillər, İlham Əliyevin qullarıdırlar, əmr isə ondan gəlib. Səbəb də İlham Əliyevin əmridir, bəhanə də.
Çox adamlar AXCP-yə bu hücumun arxasında nə dayandığının axtarışındadır. Bildiyimə görə hətta özümüzə yaxın sandığımız çevrələrdə belə bu hücumları AXCP-nin guya bu rejimin ən qəbuledilməz adamlarından biri, Ramiz Mehdiyevlə hansısa əlaqələri olması ilə bağlayanlar var. Mən dostlarımızın hakimiyyət mətbəxinin məhsulu olan bu absurd iddiani belə asanlıqla qəbul edibdə tirajlamasının səbəblərini araşdirmayacağam. Sadəcə deyirəm, səbəb o deyil, səbəb çox sadədir.
Əliyevlərin bütün hakimiyyət dövrü hakim klanın ölkədə antisosial, avtoritar ictimai sistem yaratması, hakimiyyətin bir əldə cəmlənməsi və ailə daxilində bir-birinə ötürülməsi çabalarının ard-arda düzülmüş xronikasıdır. Bu yol təzə deyil, əliyevlər bu yolu gedən sonuncu diktatorlardan biridir. Və bir qayda olaraq yaradılan eybəcər, antisosial, antiinsani sistemin öz-özünü dağıtması, daxildən çürüməsi qaçılmaz olub. Əliyev rejiminin əsas problemi ondadır ki, rejim bu çürümə prosesinin qarşını almağa, onu zəiflətməyə heç çalışmır da. Əksinə, bu proses tamamilə onun nəzarətindən çıxıb, günü-gündən artan dinamika ilə sürətlənir, genişlənir və daha cidanı çuvalda gizlətmək mümkün deyil.
İnsanlar, ölkə ictimaiyyəti isə artıq sakitcə oturub baxmır, bu rejimin hansısa proqressiv dəyişiklik edəcəyinə inamını tamamilə itirib, bu gün üzləşdiyi ağır sosial-iqtisadi durumun neçə illərdir biganəliklə seyr etdiyi siyasi proseslərin və iqtisadi talanın nəticələri olduğunun fərqindədir və görünən odur ki, sosial-siyasi sistemin sağlamlaşdırılması uğrunda mübarizəyə hazırdır.
Əliyevlərin 27 illik hakimiyyəti dövründə alternativlər həmişə olub, amma ilk dəfədir ki, rejimə qarşı cəbhənin görüntüsü bu qədər aydındır. Xalq Milli Şura və AXCP-nin timsalında real alternativ, ölkədə köklü islahatlar həyata keçirəcək qüvvəni görür. Rejimin kürkünə birə salan da budur.
Hakimiyyət böhranı zamanı avtoritar rejimlərin repressiyalara əl atması isə bütün avtoritarların zamanında olub və bütün hallarda bu repressiyalar siyasi orqanizmin daxilində gedən çürümə prosesinin açılmasına səbəb olaraq qanqrenoz vəziyyətə çatmasını nümayiş etdirməkdən başqa heç nəyə xidmət etməyib.
Tarix isə qanqrenalı siyasi orqanın qeydsiz-şərtsiz müalicəsinin yeganə yolunu ortaya qoyub – həmin orqanın amputasiyası.