Qobustan həbsxanasında saxlanan, ömürlük azadlıqdan məhrum edilən OMON komandiri Elçin Əmiraslanovun memuarının SON HİSSƏSİ
Əvvəli burda
1ci yazı
2ci yazı
3cü hissə
Azadlıqdan ömürlük məhrum edilən, hazırda Qobustan Həbsxanasında cəza çəkən, siyasi məhbus, Xüsusi Təyinatlı Polis Dəstəsinin (XTPD) komandrlərindən Elçin Səməd oğlu Əmiraslanov xatirə janrında bir mətn yazıb. Redaksiyamız həmin xatirələri müəllifin dəsti-xəttini qorumaqla, yüngülvari redaktə və düzəlişə ixtiyarınıza təqdim edir. Elçin Əmiraslanov 10.12.1996-cı ildən həbsdədir.
Məhkəmə onun barəsində 28.11.1997-ci il tarixdə ölüm hökmü çıxarıb. Sonra bu hökm ömürlük azadlıqdan məhrumetmə cəzası ilə əvəz edilib. Elçin Əmiraslanov və onun iki OMON-çu yoldaşı Avropa Şurasının və yerli hüquq müdafiəçilərinin siyasi məhbus siyahısında olsa da, onları nədənsə hələ də azadlığa buraxmırlar Bu xatirələrdə Əmiraslanov onun həyatında kəskin dönüş nöqtəsi olan Erməni təcavüzünə qarşı mübarizəyə necə qoşulmasını, müxtəlif məxfi əməliyyatları nəql edib.
Əmiraslanovun yazıları “Azadlıq”da işıqlanır, arzu edirik ki, onun və digər siyasi məhbusların özlərini azadlıqda görək.
“OMON gəldi, qaç!!”
1990-cı illərdə ermənilər və ruslar bizi “Əsədovun bandası” adlandırırdı. Heç vaxt yadımdan çıxmaz, biz ermənilərin kənd, yaxud qəsəbələrinə hücum edəndə bir-birinə qışqıraraq “OMON – yekala”-yəni “OMON gəldi” deyir və panikaya düşürdülər. Elə olurdu ki, müqavimətsiz istəyimizə çatırdıq. Çünki bizi yaxşı tanıyırdılar. Sabahını düşünən oğul qəhrəman olmaz. Biz OMON-çularda düşünmürdük.
Oskipar əməliyyatı
Və ya atalarımız bir səngərdə döyüşmüşdü, biz bir-birimizlə
1990-92-ci illərdə OMON-un çox böyük uğurlu əməliyyatları olmuşdur. Onlara misal kimi Çaykənd, Mələş, Erkəç, Buzdu ( indidə bu ərazilər Azərbaycan dövlətini nəzarəti altındadır ), Marquşavan, Mardakert ( Marquşavan indi də bizim nəzarətimizdədir ), Gədəbəy- Başkənd ( Başkənd indi də bizim nəzarətimizdədir ) əməliyyatlarını sadayala bilərəm.
Belə uğurlu əməliyyatlardan birində Qazax-Noyanbryan, İcevan istiqamətində Oskipar əməliyyatıdır. Bu əməliyyat ruslarla birlikdə hazırlanmışdı. Gəncədə yerləşən desant diviziyanın komandiri Şerbakovun bir neçə batalyonu, Bakıdan və başqa yerlərdən gəlmiş rus hərbi birləşmələri vardı, il dəqiq yadımdadı-1991- ci il idi. Yazın axırları idi bir sözlə isti vaxt idi. İcevan- Noyanbryan istiqamətində sərhədboyu çox böyük dislokasiya vardı. Yerevandan, Razdandan, Dilicandan, Kirovkadan bütün yerli polislər sərhəddə köməyə gəlmişdilər. Bir həftə ruslar və biz kəşfiyyat məlumatları əldə etməyə başladıq. Həmin qruplara yerli Əskipara yerli özünü müdafiə dəstəsindən bələdçilər hazırlamışdıq. Həmin bələdçilər həm vuruşurdular, həm də kəşfiyyatla bağlı əvəzsiz xidmətlər edirdilər: İsayev Bəxtiyar, Nuriyev Abbasəli, Əliyev Fəzail, Cəfərov Əli, Əsgərov Müslüm. Kəşfiyyat məlumatları tam toplandıqdan sonra rusların hərbi birləşmələrinin ştabında generallar tərəfindən müzakirə olunurdu. Rəhmətlik Əsədov, Qayıbov birbaşa orada iştirak edirdi. Karatelni korpus yaradılmışdı. Bala Cəfərli, Barxudarlı, Yuxarı və Aşağı Əskipara istiqamətində əməliyyatlar keçirməli idik. Mən və rəhbərlik etdiyim OMON Əskipara istiqamətində qrupa daxil olmuşduq. Heç yadımdan çıxmır rus səhra komandirilərindən Zayçenko vardı, Kroşka, Reznikov bunlar bizimlə bir istiqamətdə döyüşürdü, çox güclü texnikaları vardı. Sərhəd boyu dağ hündürlüklərində, meşəliklərdə, yaşayış məntəqələrində döyüşlər gedirdi. Tək Oskipar istiqamətində 43 nəfər əsir götürdük. Ölənlərin sayı çox idi. Əsirlərin çoxu polis işçiləri idi. Hətta orada Noyanbryanın 2-ci katibinin oğlu polis zabiti yaralı olaraq əsir düşmüşdü-onu Qazaxın xəstəxanasına yerləşdirdik, o biri əsirləri polis şöbəsinə gətirdik. Ermənilərin frontu darmadağın edilmişdi. Ermənilərə məxsus olan hərbi sursatları- top, hərbi texnika və hərbi sursatları gətirib Əskiparaya yığmışdıq. Ermənilər tərəfdən götürdüyümüz əsirlər Qazaxda polis şöbəsində dindirilirdi. Məni polis şöbəsinə çağırdılar Karlen adında əsir Kirovkanın naçalnik QAİ-si məni tanımışd. Deməli bunun babası Avak Kirovkanın Həmzəçimən kəndindən mənim atamla bir yerdə Vətən müharibəsinin iştirakçısı idi. Faşistlərə qarşı vuruşmuşdular. Səhv etmirəmsə Avak Sovet ittifaqı qəhrəmanı idi. Mənim atam uzun illər Qazaxda milisdə pasport idarəsinin rəisi işləmişdi. Bu Karlengillə bizim ailənin SSRİ vaxtı yaxşı münasibəti olmuşdu,həmişə gediş-gəlişimiz olmuşdu. Onların bir qohumları vardı Əmirbek-mütəmadi olaraq bizə gəlib-gedirdi. Əmirbek Kirovkada tədarük idarəsinin rəisi idi. Hər ildə bizim ailə müharibəyə qədər Dilican dərəsinə yaylağa gedirdik, gediş-gəlişimiz həmişə vardı. Qazaxda polis şöbəsində mən Karlenin döyülməsinə-incidilməsinə yol vermədim. 43 nəfər əsiri Gəncəyə həbsxanaya göndərdik. Bir neçə vaxtdan sonra SSRİ-prokuroru həmin əsirlərin Ermənistana qaytarılması haqqında qərar verdi. Bizdə onları qaytardıq-həmin vaxt Əsədov, Qayıbovda Qazaxda idilər.
Əli Ömərovun döyülməsi
1993-95-ci illərdə sapı özümüzdən olan baltalar da vardı. Azərbaycandan Ermənistana böyük neftdaşıma şəbəkəsi yaratmışdılar.Bu şəbəkənin əsas oyunçuları Gürcüstan şirkətləri idi. Elə olurdu ki, bir gecədə 80-100 ton yanacaq tuturduq. Bu barədə çəkilişlərdə var. Ermənistana gedən 100 tonlarla benzin-solyarka tutmuşuq. Ağac qurdsuz, igid düşmənsiz olmaz deyiblər. 1994-cü ilin oktyabrında sırf təsadüf nəticəsində mən Mahir Cavadovun evində çörək yeyirdim, özüm də idman paltarında idim. Qazaxa qayıtmalı idim. İki maşın OMON-çu idik. Hamımız silahlı idik. Mahir xahiş etdi ki, onu da yolüstü Respublika prokurorluğunda düşürək. Mahiri düşürəndə prokurorluğun ətrafındakı 7-8 nəfər hərbiçi onu həbs etmək istədilər. Mahir isə müdafiə olunurdu. Biz də məcbur olub oradakı hərbiçiləri tərkisilah etdik, prokurorluğa daxil olduq, oradakı mühafizəçiləri tərki-silah etdik. Bu hadisədə baş prokuror Əli Ömərova da xəsarət yetirmişdik. Etiraf edirəm ki, mənim xətalarım olub. Bu da bir xəta idi. Allah bilir ki, mən bu yazılarımla heç kimdən heç nə ummuram. Bizə nə maşın lazımdı, nə ev, nədə yardım. Sadəcə olaraq biz öz borcumuzu yerinə yetirmişik.
Özüm haqda qısaca
Mən Əmiraslanov Elçin Səməd oğlu 1961-ci ildə Qazaxda anadan olmuşam, tək atamın-anamın yox, elimin oğlu olmuşam. Baxmayaraq ki, atam DİN-də yüksək vəzifə sahibi olub, mən tərəkəmə bəylərinin oğul övladı kimi böyümüşəm. Nənəmin ətəyindən tutmuşam, yeddi arxadan dolananlarımın bayatılarına qulaq asmışam. İməkləməmişdən əvvəl atın belində böyümüşəm. Qarayazıda, Turşsuda, dağda-aranda formalaşmışam. Türk oğluyam. Yeddi arxadan dolananımda türkdür. Şıxlı tayfasındanam. Şıxlı tayfası çox böyük tayfadı. Şamaxıda, Qarabağda, Cənubi Azərbaycanda, Gürcüstanda, Türkiyədə də var. Qazaxda 10-a yaxın kənd Şıxlılardı. Çox tarixi şəxsiyyətlər yetişib Şıxlı kəndindən: Əliağa Şıxlinski-general, Qiyasbəy Şıxlinski-general, Əmir Aslan, Şahmar bəy, Cahandar ağa, İsmayıl Şıxlı, Osman Sarıvəlli, İsa Hüseynov-çox yazmaq olmur, Allah qismət edər yazarıq.
Bir onu deyə bilərəm ki, 1970-ci ilin axırlarında DİN Arif Heydərov və müavini Kazımov öldürüldükdən sonra onlara yaxın yüksək rütbəli zabitlər işdən çıxarıldı, yaxud həbs olunurdu. Mənim atam, atamın dayısı oğlu Kazımov Yaqubu ( hər ikisi Din-də yüksək rütbəli zabitlər idi ) Ali məhkəmənin hakimi Mansur İbayev mühakimə edib Nijni Tagilə göndərmişdi, 1997-ci il həmin hakim Mansur İbayev mənidə mühakimə edib ölüm hökmü çıxardı. Mənim ondan hakim kimi imtina etməyimə baxmayaraq.
R. Cavadov XX-əsrdə yetişmiş türk dünyasının qəhrəmanıdı. Nzami və Vidadi Şahmuradovlar OMON-un yüksək rütbəli ən qürurlu vətənpərvər zabitləri idi. Yazıda adları çəkilən OMON- döyüşçüləri, kəşfiyyatçıları, səhra komandirləri faktiki qəhrəmanlardı. Qaldı mənə – “qartalı vuran ox öz lələyindən düzəlir”. 24 ildir ki, cəza çəkirəm, qaradan o tərəfə rəng yoxdur. Vətən sağ olsun. Kişinin başında iş olar. Bir şeyə yanıram ki, anamı dəfn edə bilmədim. Uzun illər bacılarımı, onların övladlarını, qardaşımı və övladlarını, qohum əqrabamı, dostlarımı, öz övladlarımı və minlərlə məni gözləyən insanları intizarda saxladım. Bu uzun illərdə onlara çox əziyyətlər verdim.
Ey sirli tilsimli dünya!!!
Sənin sinən üstə mənim də izim qaldı
Yurdumu sevdim, qorudum, həmdə qorundum
Eldən ötrü ağladım, ağlatmadım
Sevdim, sevildim, yaşadım yaşatmaq üçün
Ac da qaldım, boyat da yedim, bal da
Haram tikə kəsmədim
Xəyanət çox gördüm tez tez yandım
Heç vaxt yandırmadım
Mən sadiq oldum, mənə də sadiq olanlar oldu
Ölümə məhkum olundum, sınmadım
Ölümün qapısını təpiklə döyməyi bacardım
Təki mənim yurdum yaşasın, mənim harada olmağım vacib deyil
İnsan böyüyür beşikdə
Məzarda yatmaq üçün
Qəhrəmanlar can verir
Yurdu Yaşatmaq üçün
Əmiraslanov Elçin əməd oğlu
18.02.2020-ci il
P.S Allah keçsin günahlarımızdan . Mən heç kimin haqqına girə bilmərəm. İndi yadıma düşdü, yazmağı qərara aldım. 1993-ilin axırları idi. Moskva xəbərlərində belə bir məlumat getdi ki, Gürcüstandan Ermənistana gedən qaz kəməri Qardabani rayonu ətrafında partladılıb. Doğrusu mənə maraqlı gəldi, həm də sevindim ki, bizdən başqa kimlərsədə var. Partlayışda Ermənistan sərhəddindən çox aralıda idi. İsa Sadıqovla görüşdük, söhbət əsnasında bildirdi ki, mənim briqadamın kəşfiyyat qrupu edib. Səhv etmirəmsə, 1994-cü illərin soyuq ayları idi, onlar Gürcütsanda Ermənistana gedən dəmir yolunda partlayış etmişdilər, sağ olsunlar. 1992-ci ildə Bakıda Qazax ziyalıları tərəfindən Qazax cəmiyyəti yaradılmışdı. Orada Vidadi Babanlı, Vaqif Səmədoğlu, Yusif Səmədoğlu, İsmayıl Şıxlı, onun oğlu Elçin Şıxlı, Nüsrət Kəsəmənli, İsa Hüseynov, Hüseyn Arif. İmkanlı şəxslərdən: Etibar Nəsibov, Akif Səməd, və bir çox şəxlsər var idi ki, onlar tez-tez yığıncaq edir Qazaxın və ətrafın mühafizəsi haqqında öz ziyalı məsləhətlərini verirdilər, hərbi texnikaların alınmağında köməklik edirdilər. Maddi cəhətdən yardımlar göstərirdilər.
Bildirmək istəyirəm ki, DİN-də OOP-idarəsi fəaliyyət göstərirdi. Ələkbər adlı polkovnik bizə çox köməkliklər elədi. Onun əslən Ermənistandan olan yaxşı bələdçiləri vardı. Bizim Ermənistana keçməyimizə və orada gizli hərəkət etməyimizə çox köməklik edirdi. Partlayıcılar, partlayıcı mexanizmlərin əldə olunmasında çox köməklikləri olub.