AXCP sədri Əli Kərimli
Düşündüm ki, İbrahim İbrahimlinin doğum günü bu böyük şəxsiyyəti xatırlamaq, onun həyat yolunu ictimai müzakirəyə çıxarmaq üçün yaxşı bir fürsətdir. İbrahim bəy haqqında yazmaq istədiyim xeyli nüanslar var.
İstiqlalçı millət vəkili, Milli Şura Koordinasiya Mərkəzinin üzvü İbrahim İbrahimli yaddaşınızda necə qalıb? İbrahim bəyi şərəfini, ləyaqətini heç zaman satmamış, şərlə mübarizədə bir addım da geri qoymamış, prinsiplərinə sədaqətli böyük şəxsiyyət sayırsınız, yoxsa bütün həyatını müəyyən ideyalara qurban vermiş, zəngin və qayğısız yaşamaq fürsətlərini qaçırmış, çoxillik mübarizəsində konkret heç nəyə nail olmamış, həyatı kasıblıqla keçmiş uğursuz bir siyasətçi? Xahiş edirəm, səmimi cavab verəsiniz.
İbrahim bəy Xalq Hərəkatının öncüllərindən idi. İstiqlalçı millət vəkili idi. Yaxşı natiq, savadlı publisist idi. Bu hökumətlə anlaşıb nazir, oliqarx da ola bilərdi. Belə bir imkanı var idi. Ya da bir çoxları kimi, partiya yaradıb üzdə müxalifətçi qalaraq, əslində Prezident Aparatının tapışırığı ilə gerçək müxalifətə müxalifətçilik edib böyük ofis, bahalı ev və bağ sahibi olar, həbs və işgəncələrdən də yayınardı, zəngin həyat sürərdi, ailəsi üçün də müəyyən imkanlar yaradardı. İbrahim bəy istəsəydi bu seçimi də edərdi. Ancaq İbrahim bəy bu seçimlərin heç birini etmədi. O, böyük əqidəsinə sona qədər sədaqətlə yaşadı.
1993-cü ilin 4 iyun dövlət çevrilişi günlərində İbrahim bəy şərin qarşısında cəsarətlə dayanan, haqq sözü deyən çox az adamdan biri oldu. Heydər Əliyevin repressiyalarının ilk hədəfi olmuş AXC-yə Bakıda rəhbərlik etmək kimi çox məsuliyyətli və riskli işi öz üzərinə götürdü. Sonra da tam 28 il ərzində büdrəmədən, maddi sıxıntılarla, həbs və işgəncələrin müşaiyyətilə çətin, ancaq şərəfli müxalifətçilik həyatı yaşadı. Ailəsinə çox təzyiqlər edildi. Onu heç yerdə işləməyə qoymadılar. Haqq etdiyi millət vəkili təqaüdünü belə vermədilər. Çörəklə sınağa çəkib sındırmaq istədilər İbrahim bəyi. Ancaq İbrahim bəy əyilmədi, mübarizəsindən vaz keçmədi, qürurla davam etdi. Dolanmaq mümkün olmayanda şəhərdəki mənzilini satıb, Bakı kəndlərində ucqar bir evə köçdü. Ancaq əyilmədi, satılmadı.
İbrahim bəyi təkcə maddi çətinliklərlə deyil, həm də həbs və işgəncələrlə sınağa çəkdilər. İbrahim bəy 15-16 oktyabr 2003-cü ildəki seçki saxtakarlığına xalq dirənişinin təşkilatçılarından biri kimi həbs edildi, “bandotdel” adlanan məlum idarədə işgəncələrə məruz qaldı. 2 ilə qədər həbsdə qalmışdı İbrahim bəy, amma habs və işgəncələr də onu qorxutmamışdı.
İbrahim bəy 2013-cü ildən, Milli Şura yaranandan onun rəhbərlərindən biri, Koordinasiya Mərkəzinin üzvü oldu. Milli Şuranın mübarizəsinin, mintiqlərinin təşkilində böyük rol oynadı. Sonuncu dəfə 2019-cu ilin 19 oktyabr mitinqində meydana mənimlə, Tofiq bəy Yaqublu ilə birlikdə çıxacaqdı. Səhər saatlarında bizə gələndə həbs edib ağır işgəncələrə məruz qoymuşdular. Fotodan görürsünüz ki, qansız cəlladlar bu böyük şəxsiyyəti necə qəddarcasına boğmuşdular. Yaxın adamlar bilir ki, həmin boğmadan sonra İbrahim bəy daha heç vaxt sağalmadı. Əməliyyat da olundu, ancaq sağalmadı. Ondan il yarım sonra isə İbrahim bəyi itirdik.
Formal olaraq İbrahim bəy xərçəng xəstəliyi nəticəsində dünyasını dəyişib. Ancaq mən onun ölümünü təbii ölüm kimi qəbul edə bilmirəm. İbrahim bəy vaxtaşırı tibbi müayinələrdən keçə bilsəydi, xərçəng xəstəliyindən bir də xəstəliyin son mərhələsində deyil, daha erkən vaxtlarda xəbər tutardı. Bundan əlavə, İbrahim bəyin həyatı boyu üzləşdiyi haqsızlıqlar, maddi sıxıntılar, həbs və işgəncələr, streslər də onun ömründən kəsib, ölümünü tezləşdirirdi. İbrahim bəyi satın ala, əyə, sındıra bilməsələr də, ömründən xeyli kəsə bildilər, ölümünü yaxınlaşdırdılar…
Qayıtmaq istəyirəm yazının əvvəlinə. İbrahim bəy onun əqidə dostları üçün əlbəttə ki, ləyaqət simvoludur, ömrü əyilmədən, bir sifətlə, dimdik, qürurla yaşamaq simvoludur. Bəs bütövlükdə xalqımız necə düşünür? Kimdir İbrahim İbrahimli. Ömrünü xalq üçün şam kimi sona qədər yandırmış ləyaqətli böyük şəxsiyyətmi, yoxsa ömrünü nəticəsiz mübarizəyə həsr etmiş, yaşamağı bacarmamış, uğursuz bir siyasətçimi? Bir çoxlarınız haqlı olaraq düşünə bilərsiniz ki, xalqa belə bir sual verməyə nə ehtiyac var, əlbəttə, xalq hər zaman ləyaqətlə yaşamaqdan yandır. Mən də hər zaman buna inanmışam. Ancaq təəssüflə onu da bildirirəm ki, əqidə alverinə haqq qazandıranların da sayı son vaxtlar xeyli artıb. Odur ki, daha çox adam bu suala cavab versin: İbrahim İbrahimli kimdir sizin üçün, onu necə xatırlayacaqsınız?