AXCP Rəyasət Heyətinin üzvü Fuad Qəhrəmanlı
Seymur Həzi status yazıb soruşur ki, Rusiya Azərbaycan arasındakı gərginliyin səbəbi nədir, kim kimdən imtina edir? Əslində kimsənin kimsədən imtina etdiyi yox. Əksinə, hazırkı gərginliyə səbəb Azərbaycana yönəlik bir – birinə diametral ziddiyətlərin artması və ənənəvi balans siyasətinin dərinləşməkdə olan geosiyasi toqquşmalar qarşısında keçərsiz qalmasıdır.
Necə?
✅ Xatırlayaq, İlham Əliyevin son Moskva səfəri hansı vaxta təsadüf edirdi? AB Şurası sədri Şarl Mişel Cənubi Qafqaza səfər etdi və bu səfər müddətində onun da iştirakı ilə Batumda Gürcüstan, Ukrayna və Moldova AB – yə inteqrasiya barədə bəyannamə imzaladlar. Bu ərəfədə Mişellə görüşdə İlham Əliyev AB – nin Azərbaycana daha çox yardım ayırması istəyini dilə gətirməklə, həm də bu qurumla əməkdaşlıqda maraqlı olduğunu ifadə etmiş oldu. Çünki aydındır ki, bu yardımın ayrılması elə belə olmur, qarşılığında Azərbaycan da gərək Avrointeqrasiya istiqamətində nələrsə etmiş olsun.
Təqribən bu ərəfədə Azərbaycan Gürcüstanda Rusiya təhlükəsinə qarşı keçirilən NATO təlimlərində də iştirak etdi. Bu olay, Batum bəyannaməsi və hər fürsətdə Qərbə daha çox yaxınlaşmaq istəyən Paşiniyanın mövqeyi fonunda İlham Əliyevin də AB ilə əməkdaşlığa yox deməməsi, rayonlara səfəri zamanı AB ilə Strateji Əməkdaşlıq sazişinin imzalanacağını bildirməsi, Moskvada ciddi narahatlıq doğurdu. Bundan az əvvəl isə Türkiyə prezidenti Ərdoğanla Şuşada imzalanmış vahid müdafiə siyasətinin qurulması barədə bəyannamə, Türkiyə vasitəsi ilə Cənubi Qafqaza nüfuz etməyə çalışan NATO nun genişlənmə siyasətinə isterik yanaşan Putinin onsuz da əsəblərinə toxunmuşdu.
✅ Məhz bu ərəfədə, Putinin çağırışı ilə İlham Əliyev Moskvaya getdi. İkitərəfli görüşdə Putinin ondan əsas istəyi Azərbaycanın KTM-yə daxil olması idi. Bununla Moskvanın gözündə etibarsızlaşmış İlham Əliyevin Qərblə əməkdaşlığı genişləndirmək yolunu bağlamağa çalışılır və Türkiyə ilə hərbi strateji birliyin qarşısının alınması istənilirdi.
İlham Əliyev isə Putini inandırmağa çalışırdı ki, Rusiya Qarabağda nə istəyibsə, o, Azərbaycanımn milli maraqlarından güzəştə gedərək bu istəyi təmin efib. Hətta nəinki Qarabağda, hətta Ermənistanla sərhəddə gərginliyin yaradılmasında iştirak edərək, rus qoşunlarının iki ölkənin sərhədlərini nəzarətə götürməsinə və Rusiyanın Cənubi Qafqazda daha da möhkəmlənməsinə də kömək edib. Bütün bu xidmətləri nəzərə alaraq Moskva Azərbaycanın AB ilə əməkdaşlıq məsələsinə əngəl olmağa çalışmamalıdır. Çünki, əgər Azərbaycan iqtidarı AB ilə əməkdaşlıqdan yayınsa, Strateji Əməkdaşlıq sazişini imzalaması, üstəlik hələ bir də KTM – yə də daxil olsa, bu Qərbin ölkədəki demokratiya problemlərini əsas götürərək Belarus nümunəsində olduğu kimi Azərbaycana da ağır sanksiyalar tətbiq etməsi ilə nəticələnə bilər. O zaman isə, həm 30 il ərzində korrupsiya yolu ilə yığılaraq Qərbdə yerləşdirilən yüz milyarddan artıq vəsait əldən çıxar, həm də neftdən asılı iqtisadiyyat tamamilə çökə bilər.
✅ Sözü gedən səfərdən sonra Jirinovskinin ard – arda Azərbaycanı təhdid etməsi və İlham Əliyevi hədələnməsi onu göstərir ki, Moskva görüşündə İlham Əliyev dediyimiz səbəbdən Putinin tələbini qəbul etməyib. Bu gün yaşanan gərginliyin səbəbi də məhz budur.
Rusiyanın Jirinovskini vasitəsi ilə bu barmaq silkələmələrindən sonra Azərbaycanın “sülhməramlıların” razılığı ilə Ermənistandan Qarabağa hərbi yük daşıyan avtomobillərin gəlişi barədə görüntülər yaymasını və daha sonra Müdafiə Nazirliyinin rus hərbçilərindən erməni silahlı birləşmələrini ərazimizdən çıxarmağı tələb etməsini Rusiyanın təzyiqlərinə bir cavab saymaq olar.
Bunla mesaj verilir ki, Moskva Azərbaycanın AB ilə münasibətlərinə qarışmayacağı təqdirdə, 10 noyabr bəyanatından keçən doqquz ay ərzində Qarabağda Rusiyanın etdiklərinə necə göz yumulubsa, yenə də eyni qaydada heç bir reaksiya verilməyə bilər. Yox, əgər Rusiya buna görə Azərbaycan iqtidarına təzyiqi artırmaqda davam edəcəksə, onda da 10 noyabr Bəyanatına əsasən Rusiyanın Qarabağda öz öhdəliklərini yerinə yetirmədiyi gündəmə gətirilərək, Moskvaya əks cavablar veriləcək.
Bu baxımdan Azərbaycan rəhbərliyinin indiki mövqey Rusiyanı Qarabağda aldığı imtiyazlarla, sahib olduğu hərbi nəzarə imkanları ilə razılaşıb, AB ilə münasibətlərə maneəyə olmaması üçündür.
✅ Ən tragikomik vəziyyət budur ki, Azərbaycan rəhbərliyinin Qərblə münasibətlərdə tutduğu hazırkı israrlı mövqe milli maraqlarımıza görə deyil, öz korrupsiyasının girovuna çevrilməsinə görədir. Və xoşbəxtlikdən bu mövqe ilə milli maraqlarımız indi üst – üstə düşür.