စစ်ကိုင်းတိုင်း ပုလဲမြို့ဘက်မှ ရိက္ခာပို့ပြန်လာသော စစ်ယာဉ်တန်းကို မိုင်းဆွဲတိုက်ခိုက်ခဲ့ကြောင်း ချင်းတွင်းရိုးမ မဟာမိတ်တပ်ပေါင်းစုက ယနေ့(မေ ၁၅) ထုတ်ပြန်သည်။
ယနေ့နံနက် ၄ နာရီကျော်က အစီးရေ ၁၂ စီးပါစစ်ယာဉ်တန်းသည် ပုလဲဘက်မှအပြန် ယင်းမာပင်မှတစ်ဆင့် မုံရွာမြို့သို့ဆက်သွားရာ မြို့သစ်လမ်း ခွဲအရောက်တွင် ကာကွယ်ရေးတပ်များထောင်ထားသော မိုင်းလေးလုံးကို ခြေကျင်ဆင်းလာသော ပျူစောထီးများ ခလုတ်တိုက်မိရာက ပေါက်ကွဲခဲ့ခြင်းဖြစ်ကြောင်း ထုတ်ပြန်ချက်တွင် ဖော်ပြသည်။
အဆိုပါပေါက်ကွဲမှုကြောင့် စစ်ကားတစ်စီးမီးလောင်သွားပြီး စစ်ကောင်စီတပ်နှင့် ပျူစောထီးများ ထိခိုက်သေဆုံးမှုများနိုင်ကြောင်း အသိပေးသည်။
ထို့နောက် အထိနာသွားသော စစ်ကောင်စီတပ်များသည် တိုက်ခိုက်ခံရသည့်နေရာနှင့် ၄ ဖာလုံခန့်အကွာတွင်ရှိသည့် ရွာသာယာကျေးရွာအား ဝင်ရောက်မီးရှို့ဖျက်ဆီးခဲ့ရာ နေအိမ် ၂၃ လုံးမီး လောင်ဆုံးရှုံးသွားသည်ဟု ထုတ်ပြန်သည်။
အထက်ပါစစ်ကောင်စီတပ်ယာဉ်တန်းအား မုံရွာ-ညောင်ပင်ကြီးဇက်ကူးတို့မှ အင်အားအပြည့်နှင့် ကားနှစ်စီး ရွာထိပ်ထိလာကြိုပြီး ပြည်သူအိမ်းများ မီးရှို့ဖျက်စီးသွားသော စစ်ကောင်စီတပ်ယာဉ်တန်းနှင့်အတူ မုံရွာမြို့ဘက်သို့ ပြန်ဆုတ်သွားကြောင်း ဖော်ပြထားသည်။
