စစ်ကိုင်းတိုင်း၊ ရွှေဘို-မြစ်ကြီးနားလမ်းမကြီးပေါ်တွင်စစ်ကောင်စီတပ်ကားကြီးနှစ်စီး မိုင်းဆွဲတိုက်ခိုက်ခံရပြီး တွဲကားမီးလောင်ပျက်စီးသွားကြောင်း ဒေသတွင်းသတင်းရင်းမြစ်များက ပြောသည်။
ယမန်နေ့( မေလ ၂၈ ရက်) ည ၉ နာရီခွဲ အချိန်က စစ်ကိုင်းမြို့မှ ရွှေဘိုဘက်သို့ ဦးတည်ထွက်လာသည့် အကြမ်းဖက် စစ်ကောင်စီတပ်သားများလိုက်ပါလာသော တွဲကား ၁စီးနှင့် ၁၀ဘီးကား ၁စီးကို နယ်စည်းမခြားစစ်ကိုင်းသားတပ်ဖွဲ့က မိုင်းဆွဲတိုက်ခိုက်ခဲ့ခြင်းဖြစ်ကြောင်း စစ်ကိုင်းမြို့နယ် သတင်းမှန်ပြန်ကြားရေးက အသိပေးသည်။
ရွှေဘို-မြစ်ကြီးနားလမ်း၊ စစ်ကိုင်းမြို့နယ် ကျော်ဇေယျာရွာနှင့် ချိုင်းကြီးရွာကြားတွင် မိုင်းဆွဲတိုက်ခိုက်ခံခဲ့ရခြင်းဖြစ်ပြီး အကြမ်းဖက်စစ်ကောင်စီ၏ တွဲကားနှင့် ၁၀ ဘီးကား နှစ်စီးလုံးမိုင်းထိမှန်ခဲ့ကြောင်း၊ တွဲကားမှာ ထိမှန်သည့်နေရာမှာတင် မီးလောင်ပြီးထိုးရပ်သွားကြောင်းတပ်ဖွဲ့တာဝန်ရှိသူက စစ်ကိုင်းမြို့နယ် သတင်းမှန်ပြန်ကြားရေးသို့ဖြေကြားထားသည်။
“ကားပေါ်မှာ လိုက်ပါလာတဲ့ စကစတပ်သားအင်အားများတယ်လို့သိရပြီး အထိအခိုက်အသေအပျောက်ရှိနိုင်တယ်လို့သိရပါတယ်။ မီးလောင်သွားတဲ့ စစ်ကောင်စီတွဲကားကို တခါတည်း ချိတ်ဆွဲသွားတယ်လို့သိရပါတယ်။ စစ်ကိုင်းကနေထွက်လာတဲ့ ကားများလို့ ချက်ချင်းပြန်ဆုတ်ခဲ့ကြပြီး ကာကွယ်ရေးရဲဘော်တွေ အထိအခိုက်မရှိဘူးလို့သိရပါတယ်။”ဟု စစ်ကိုင်းမြို့နယ် သတင်းမှန်ပြန်ကြားရေးက ပြောသည်။
