ပဲခူးမြို့တွင် ဆိုင်ကယ်နှင့်ကားများကို တားဆီးစစ်ဆေးနေသော စစ်ကောင်စီလက်အောက်ခံ ရဲနှင့်စစ်သားများမှ ကားရပ်မပေးဟုဆိုကာ ပစ်ခတ်စဥ် ဒုရဲမှူးတစ်ဦးသေဆုံးသွားကြောင်း ပဲခူးမြို့ခံများက ပြောသည်။
ဖြစ်စဥ်မှာ ယနေ့(ဇွန် ၁)ညနေ ၅နာရီခန့်က ရန်ကုန် – မန္တလေးလမ်းဟောင်း ပဲခူးတက္ကသိုလ်အ နီးလမ်းဆုံတွင် စစ်ကောင်စီလက်အောက်ခံရဲများက တားဆီးစစ်ဆေးခဲ့သည်။
ထိုသို့ စစ်ဆေးမှုများပြုလုပ်နေစဥ် အိမ်စီးကားတစ်စီးမှာ ချက်ချင်းရပ်တန့်မပေးဘဲ ကုန်တင်ကားတစ်စီးနှင့်ကွယ်ကာ ရှေ့သို့ကျော်သွားစဥ် စစ်ဆေးရေးအဖွဲ့မှ ရဲတစ်ဦးက ကားနောက်သို့ပြေးလိုက်ပြီး ကားတံခါးဆွဲဖွင့်ပြီး အနီးကပ်ပစ်ခတ်ခဲ့ခြင်းဖြစ်သည်ဟု ဒေသခံများက ပြော သည်။
သေဆုံးသွားသူမှာ သီဟဆိုသူဖြစ်ပြီး ၎င်းသည် ပဲခူးမြို့ဇာတိဖြစ်ကာ စစ်ကောင်စီလက်အောက် တွင် ဒုရဲမှူးရာထူးဖြင့် ပြင်ဦးလွင်မြို့၌ တာဝန်ကျနေသူဖြစ်သည်။
“ပြင်ဦးလွင်ကနေ လာလည်တာ။ ပဲခူးမြို့ကမွေးရပ်မြေအိမ်ကို၊ သူအိမ်က ဆည်မြောင်းလမ်းမှာ”ဟု ပဲခူးမြို့ခံတစ်ဦးက ပြောသည်။
စစ်ကောင်စီလက်အောက်ခံတပ်ဖွဲ့ဝင်အချင်းချင်း ပစ်သတ်ခံရ၍ သေဆုံးသွားသူ ဒုရဲမှူးသီဟ၏ ရုပ်အလောင်းကို ပဲခူးဆေးရုံကြီး ရင်ခွဲရုံသို့ ပို့ထားကြောင်း သိရသည်။
