●ယမတောင်ကုန်းတွင်တပ်စွဲထားသောစစ်ကောင်စီတပ်ကို PDFများကတိုက်ခိုက်ရာအထိနာ၍လေကြောင်းပစ်ကူပေး
ကန့်ဘလူမြို့နယ် ကိုးတောင်ဘို့ရွာအုပ်စုကို ရဟတ်ယာဥ်ဖြင့် တိုက်ခိုက်ပြီးအင်အားဖြည့်တင်းလာသည့် စစ်ကောင်စီတပ်ဖွဲ့ဝင် ၁၀၀ ခန့်သည် အောင်သဒ္ဓိကျောင်းဝင်းအတွင်း တပ်စွဲထားကာ ပြည်သူများကို ကျောင်းပြင်ပသို့ ထွက်ခွင့်မပေးတော့ကြောင်းပြည်သူ့ကာကွယ်ရေးရဲဘော်များပြောသည်။
ကျေးရွာ ငါးရွာပါဝင်သည့် ကိုးတောင်ဘို့ကျေးရွာအုပ်စုအားယမန့်နေ့( ဇွန် ၃ရက်) နေ့လည်တွင် စစ်ကောင်စီက လေကြောင်းမှ တိုက်ခိုက်ပြီးနောက် တပ်ဖွဲ့ဝင်၁၀၀ ခန့်ကို ရဟတ်ယာဥ်ဖြင့် ပို့ဆောင်ခဲ့ခြင်းဖြစ်သည်။ ယမန်နေ့က တိုက်ပွဲဖြစ်၍ အောင်သဒ္ဓိကျောင်းတွင် ထွက်ပြေးခိုလှုံနေသောဒေသခံများကို စစ်ကောင်စီတပ်က ကျောင်းပြင်ထွက်ခွင့်မပေးဘဲ ပိတ်ဆို့ထားခြင်းဖြစ်သည်။
“မနေ့က စစ်ခွေး တစ်ရာလောက်ရတော့ ကွက်သစ်ထဲက အောင်သဒ္ဓိကျောင်းမှာ တပ်စွဲထားတယ်။အရပ်သားတချို့တဝက် ပိတ်မိနေတယ်” ဟု ကိုးတောင်ဘို့ပြည်သူ့ကာကွယ်ရေးအဖွဲ့မှ ရဲဘော်တစ်ဦးကပြောသည်။
ကိုးတောင်ဘို့၊ ယမတောင်ကုန်းတွင် တပ်စွဲထားသည့် စစ်ကောင်စီတပ်ကိုဒေသတွင်း ပြည်သူ့ကာကွယ်ရေးမဟာမိတ်များက ဇွန်လ ၃ရက်တွင် တိုက်ခိုက်ခဲ့ရာ အထိနာပြီးနောက်စစ်ကောင်စီတပ်က လေကြောင်းအသုံးပြုတိုက်ခိုက်ခဲ့သည်။
စစ်ကောင်စီတပ်ကဂျက်ဖိုက်တာနှစ်စင်းဖြင့် ကိုးတောင်ဘို့ရွာ၊ပိတောက်ခုံ နှင့်ကွက်သစ်ရွာကိုလေကြောင်းမှတိုက်ခိုက်ခဲ့သည်။
“လေကြောင်းကနေ တိုက်ပြီး အင်အားလည်း ထပ်တိုးလာလို့ ကျွန်တော်တို့ ပြန်ဆုတ်ခွာလာခဲ့ရတယ်။ လက်နက်အင်အား မမျှလို့။ လက်နက်သာ အလုံအလောက်ရှိရင် တက်သိမ်းမှာ”ဟု ပြည်သူ့ကာကွယ်ရေးတပ်ဖွဲ့ဝင်တစ်ဦးကပြောသည်။
ဇွန် ၃ ရက်စစ်ကောင်စီ လေကြောင်းတိုက်ခိုက်မှုတွင် ဒေသခံပြည်သူ့ကာကွယ်ရေးတပ်ဖွဲ့ဝင်များထိ့ခိုက်မှု မရှိဘဲ စစ်ကောင်စီတပ်မှ သေဆုံးဒဏ်ရာရရှိမှုကိုမူမသိရသေးပေ၊
စစ်ကောင်စီတပ်ကဇွန် ၂ ရက်ကလည်း လက်နက်ကြီးဖြင့် ပစ်ခတ်သဖြင့်ဒေသခံပြည်သူ သုံးဦးသေဆုံးခဲ့သည်။ထို့အတွက် တူသောအကျိူးရကြရန် ဆုတောင်းနေသည်ဟု ဒေသခံများကပြောသည်။
စစ်ကောင်စီတပ်သည် ယခုအခါ ကန့်ဘလူမြို့နယ်အတွင်း စစ်ရေးလှုပ်ရှားမှုပိုမိုပြုလုပ်လာပြီး ကန့်ဘလူ–နတ်အင်း–စံပယ်နံ့သာလမ်းကြောတစ်လျှောက် အကြမ်းဖက်စစ်ကောင်စီတပ်သား (၂၅၀) ဝန်းကျင် တပ်ချထားကြောင်း၊ ဖုန်းလိုင်းများလည်း ဖြတ်တောက်ထား၍ ယခုရက်ပိုင်းခရီး
သွားလာခြင်းများမပြုလုပ်သင့်ကြောင်းဒေသတွင်းသတင်းများဖော်ပြပေးနေသည့် Infinity Groupကသတိပေးထားသည်။
