ပြည်သူ့ကာကွယ်ရေးတပ်ဖွဲ့ PDF နှင့် ဒေသခံကာကွယ်ရေးတပ်ဖွဲ့များ အင်အားကောင်းလာ၍ တဆင့်တက်ကာ ရန်သူစစ်ကောင်စီကို ခြေမှုန်းသိမ်းပိုက်နိုင်ရန် ပြင်ဆင်ကြရမည်ဟု NUG ယာယီသမ္မတက ပြောကြားသည်။
ယနေ့ကျင်းပသော အမျိုးသားညီညွတ်ရေးအစိုးရ၏ ၅၈ ကြိမ်မြောက် အစိုးရအဖွဲ့အစည်းအဝေး အဖွင့်မိန့်ခွန်းတွင် ယာယီသမ္မတဒူဝါလရှီးလက ထည့်သွင်းပြောကြားခြင်းဖြစ်သည်။
“၂၀၂၃ တွင် မင်းအောင်လှိုင်ဦးဆောင်သော စစ်ကောင်စီမှ လိမ်ညာပြီး ကျင်းပမည့် ရွေးကောက်ပွဲကို လုံးဝချေဖျက်နိုင်အောင် နိုင်ငံရေး စစ်ရေး ၂ခုစလုံးဖြင့် လုပ်ဆောင်နိုင်ဖို့ ပြင်ဆင်ဖို့ အရေးကြီးတဲ့ အချိန်ဖြစ်ပါတယ်” ဟု ယာယီသမ္မတက ဆက်ပြောသည်။
ယင်းအတွက် သက်ဆိုင်ရာဌာနအားလုံးတွင် တာဝန်ရှိပြီး စစ်အာဏာသိမ်းခေါင်းဆောင် မင်း အောင်လှိုင်နှင့် စစ်အုပ်စုကို ချေမှုန်းရန် ဌာနအားလုံးကို စည်းရုံးပေးရန်၊ လူထုကို အသိပေးရန်၊ အားပေးရန် လိုအပ်ကြောင်းလည်း ယာယီသမ္မတက ညွှန်ကြားသည်။
NUG သည် ၂၀၂၂ တွင် စစ်ရေးနှင့် ကျန်သည့်ကိစ္စရပ်များ အခြေခိုင်အောင် တည်ဆောက်သည့် ကာလဖြစ်၍ PDF တပ်ရင်းပေါင်း ၂၅၇ ရင်းခန့်၊ ကာကွယ်ရေးဝန်ကြီးဌာန(MOD)နှင့် ချိန် ဆက်ထားသော ဒေသခံကာကွယ်ရေးတပ်ဖွဲ့ ၅၀၀ ခန့်ရှိနေပြီဟု ယာယီသမ္မတက အသိပေးသည်။
တော်လှန်ရေးအင်အားစုများဘက်က အားသာမှုရှိလာလေလေ၊စစ်ကောင်စီဘက်က ယုတ်မာရိုင်းစိုင်းမှုများ အစွမ်းကုန်လုပ်ဆောင်လာမည်ဖြစ်၍ သက်ဆိုင်ရာဝန်ကြီးဌာနများက အဘက်ဘက်မှ ကြိုတင်ပြင်ဆင်နိုင်အောင်၊ ကာကွယ်နိုင်အောင် လုပ်ဆောင်ပေးရန် လွန်စွာအရေးကြီးကြောင်း ပြည်ထောင်စုဝန်ကြီးချုပ် မန်းဝင်းခိုင်သန်းက ပြောသည်။
“အခုဆိုရင် စစ်ကိုင်းဘက်မှာ ရွာတွေကို မီးရှို့နေတာ နေ့စဉ်ရက်ဆက်ဖြစ်နေပါတယ်။ဒါတွေနဲ့ပတ်သက်ပြီးကာကွယ်ရေးဝန်ကြီးဌာနအနေနဲ့နည်းလမ်းရှာပြီးထိထိရောက်ရောက်ကာကွယ်နိုင်ဖို့ အမြန်ကြိုးစားပေးစေချင်ပါတယ်”ဟုဝန်ကြီးချုပ်က တိုက်တွန်းသည်။
ဆက်လက်ပြီး “အခက်အခဲတွေ ဘယ်လောက်ရှိရှိ ရင်ဆိုင်ကျော်လွှားဖို့ အသင့်ဖြစ်နေတဲ့ အညာ ဒေသက ကျွန်တော်တို့ပြည်သူတွေရဲ့ ဇွဲသတ္တိတွေဟာကျွန်တော်တို့တော်လှန်ရေး
အတွက် တကယ့်ကို အင်အားဖြစ်စေတာကြောင့်အလွန်ဂုဏ်ယူ ကြောင်းလည်း ပြောကြားလိုပါတယ်” ဟုဝန်ကြီးချုပ်က ပြောသည်။
