ရှမ်းပြည်နယ်မြောက်ပိုင်း၊ ကွတ်ခိုင်မြို့နယ်အတွင်းမြောက်ပိုင်းမဟာမိတ်အဖွဲ့များနှင့် စစ်ကောင်စီတပ်တို့ တိုက်ပွဲပြင်းထန်နေပြီး စစ်ကောင်စီဘက်က ပစ်ခတ်သည့်လက်နက်ကြီးကျည်သည် ဇွပ်အောင်စစ်ဘေးရှောင်စခန်းအတွင်းကျရောကပေါက်ကွဲခဲ့၍စစ်ရှောင်အမျိုးသမီးသုံးဦးသေဆုံးခဲ့သည်ဟုဒေသခံများကပြောသည်။
စစ်ကောင်စီတပ်က ယနေ့(ဇွန် ၁၇ရက်)နံနက် ၁၁နာရီခန့်တွင် ကွတ်ခိုင်မြို့နယ် ဇွပ်အောင် စစ်ရှောင်စခန်းဘက်သို့ လက်နက်ကြီးဖြင့် ပစ်ခတ်ခဲ့ခြင်းဖြစ်ပြီး အမျိုးသမီးသုံးဦးသေဆုံးကာ အမျိုးသားတစ်ဦး ဒဏ်ရာရရှိခဲ့သည်ဟု ဒေသခံတစ်ဦးက ပြောသည်။
“စစ်ဘေးရှောင်းစခန်းက ပြည်သူသုံးဦး လက်နက်ကြီး ထိ သေတယ်။ စစ်ကောင်စီတပ်က စပ်တပ်ကုန်းကနေပစ်နေတာ”ဟု ကွတ်ခိုင်မြို့ခံတစ်ဦးက ပြောသည်။
မြောက်ပိုင်းမဟာမိတ်အဖွဲ့နှင့် စစ်ကောင်စီတပ်တို့သည် ကွတ်ခိုင်မြို့နယ်တွင်ယခုရက်ပိုင်းတိုက်ပွဲပြင်းထန်နေပြီး စစ်ကောင်စီကအထိနာသဖြင့် အရပ်သားပစ်မှတ်များကိုပါ ဦးတည်တိုက်ခိုက်နေသည်ဟု စစ်ဘေးရှောင်များက ဆိုသည်။
ဇွပ်အောင်စစ်ဘေးရှောင်စခန်းသည် ယခင်က ရှမ်းမြောက်တိုက်ပွဲများကြောင့် ဖွင့်လှစ်ထားခြင်းဖြစ်ပြီး စစ်ဘေးရှောင်ဦးရေ တစ်ထောင်ခန့်ရှိနေသည်။
တိုက်ပွဲများဆက်လက်ပြင်းထန်နိုင်၍ ဇွပ်အောင်စခန်းမှ စစ်ဘေးရှောင်များသည် ကွတ်ခိုင်မြို့ပေါ်သို့ အရေးပေါ်ပြောင်းရွှေ့နေကြရသည်။
