● စစ်တပ်က ပြည်သူလေးဦးကိုသေနတ်ဖြင့်ပစ် ၂ ဦသေ၊ ၂ ဦးဒဏ်ရာရ
တနင်္သာရီတိုင်း၊လောင်းလုံးမြို့နယ်တွင် စစ်ကောင်စီတပ်က ပြည်သူများကိုပစ်မှတ်ထားအကြမ်းဖက်တိုက်ခိုက်နေ၍ ပြည်သူများစစ်ရေးသတိဖြင့်နေထိုင်ကြရန်နှင့် ခရီးသွားလာခြင်းမပြုရန် လောင်းလုံးမြို့နယ် ပြည်သူ့ကာကွယ်ရေးတပ်ဖွဲ့ (LL PDF)က ယနေ့ သတိပေးထုတ်ပြန်သည်။
အကြမ်းဖက်စစ်ကောင်စီတပ်သည် အပြစ်မဲ့ပြည်သူများ၏ အသက်၊အိုးအိမ်များကို ဖျက်ဆီးသတ်ဖြတ်မှုများ ဆက်တိုက်ပြုလုပ်နေသောကြောင့် ယခုလို ထုတ်ပြန်လိုက်ခြင်းဖြစ်သည်ဟု LL PDFကထုတ်ပြန်သည်။
“လောင်းလုံးက PDFတွေကို အမြစ်ပြတ်ရှင်းမယ်ဆိုပြီး စစ်ကြောင်းထိုးနေတာ PDFတွေကိုမတွေ့တော့လို့၊ အခုတော့ ဆန္ဒပြပွဲလုပ်နေတဲ့ သူတွေ့နဲ့ CDMလုပ်မယ့်သူတွေကို ဖမ်းမယ်ဆိုပြီး ရွာတွေမှာသောင်းကျန်းနေတာ”ဟု လောင်းလုံမြို့ခံတစ်ဦးကပြောသည်။
လက်ရှိတွင်ဒေသခံ အများစုမှာစစ်ရှောင်နေကြသည်ဟု ဒေသခံများကပြောသည်။
လောင်းလုံးမြို့နယ်တွင် စစ်ကောင်စီတပ်အင်အား ၁၅၀ ခန့်ဖြင့် ရောက်ရှိနေပြီး CDMဝန်ထမ်းများအပါဝင်ပြည်သူ ၇ဦးကို ဖမ်းဆီးထားသည်ဟု ဒီမိုကရေစီအရေး လှုပ်ရှားမှုသပိတ်ကော်မတီ (ထားဝယ်ခရိုင်)က ထုတ်ပြန်ထားသည်။
ထိုအပြင် ဒေသခံရွာသား ၄ဦးကိုလည်း အကြောင်းမဲ့ပစ်ခတ်ခဲ့ပြီး ၂ ဦးသေဆုံးကာ ၂ ဦး ဒဏ်ရာပြင်းထန်စွာရရှိခဲ့သည်ဟုလည်းထုတ်ပြန်ထားသည်။
လောင်းလုံမြို့နယ် ဝေဒီကျေးရွာနေ မနွယ်နီဌေးကိုယမန်နေ့ (ဇွန် ၁၆) ညတွင်ဖမ်းဆီးခေါ်ဆောင်သွားပြီး လမ်းတွင်သေနတ်ဖြင့် ပစ်ခတ်၍ လမ်းဘေးတွင် စွန့်ပစ်ခဲ့သည်။ ရွာသူ/သားတွေ၏ ကူညီပေးမှုကြောင့် မနွယ်နီဌေးကို အချိန်မှီ ဆေးရုံတင်ပို့နိုင်ခဲ့သည်ဟု သပိတ်ကော်မတီကဆိုသည်။ ထိုပြင်ဂေါ့အင်းကျေးရွာရှိ အသက် ၄၁ အရွယ် မအေမီဖြိုးဝေကို နေအိမ်တွင် စစ်ကောင်စီတပ်က အကြမ်းဖက်ဝင်ရောက်ပြီးမအေမီဖြိုးဝေကို ပစ်သတ်ခဲ့သည်။ဝေဒီကျေးရွာအတွင်းသို့ သေနတ်ပစ်ခတ် ဝင်ရောက်ခဲ့ပြီးမနွယ်နီဌေး၏နေအိမ်ကိုမီးရှို့ဖျက်ဆီးခဲ့ပြီး မအေမီဖြိုးဝေအိမ်ကိုလည်း မီးရှို့သွားထားသည်။
ထိုနောက် ဂေါ့အင်းကျေးရွာ၊ ကြယ်တောင်အနီး အသက် (၂၀)ခန့်ရှိ လမ်းသွားလမ်းလာ အမျိုးသားနှစ်ဦးကိုလည်းစစ်ကောင်စီတပ်က သေနတ်ဖြင့်ပစ်ခတ်ခဲ့သည်။ ထိုနှစ်ဦးအနက် တဦးသေဆုံးပြီး အခြားတဦးကို အချိန်မှီဆေးရုံတင်ပို့ခဲ့နိုင်သည်။
