ကရင်နီ(ကယား)ပြည်နယ်၊ဒီးမော့ဆို မြို့နယ်၊ဒေါငံခါးကျေးရွာတွင်စစ်ကောင်စီစစ်ကြောင်းထိုးလာသဖြင့် ပြည်သူလူထူထွက်ပြေးရင်းနေအိမ်များတွင်ကျန်ရစ်ခဲ့သော ဆိုင်ကယ်များကို ထုတ်ယူနိုင်ခဲ့ပြီး ပိုင်ရှင်ထံ ပြန်လည်အပ်နှံမှုများပြုလုပ်နေ ကြောင်း ပြည်သူ့ကာကွယ်ရေးတပ်-ဒီးမော့ဆိုDMO-Local PDF က ထုတ်ပြန်သည်။
ကယား(ကရင်နီ)ပြည်နယ်၊ ဒီးမော့ဆိုမြို့နယ်၊ ဒီး/ကျေးအုပ်စု၊ ဒေါငံခါးကျေးရွာတွင် ပြည်သူ့ကာကွယ်ရေးတပ်-ဒီးမော့ဆို(DMO-Local PDF)တပ်ခွဲအချို့နှင့် KA(ကရင်နီတပ်မတော်) တပ်ဖွဲ့အချို့တို့ပူးပေါင်းကာ နယ်မြေရှင်းလင်းရေးပြုလုပ်စဉ် လူထုနေအိမ်မှ ကျန်ရစ်လျက်ရှိသော ဆိုင်ကယ်(၁၆)စီးကို ယနေ့ ပြန်ထုတ်ယူနိုင်ခဲ့သည်ဟုအသိပေးသည်။
![(ပြည်သူများ၏ ဆိုင်ကယ်များကို ဒေသခံပြည်သူ့ကာကွယ်ရေးတပ်များက ထုတ်ယူလာပြီးပြန်အပ်ရန် ပြင်ဆင်ထားစဥ်။ ဓါတ်ပုံ-DMO- Local PDF)](https://i0.wp.com/www.ludunwayoo.com/wp-content/uploads/2022/06/288685086_404336015089190_5235600265090398342_n.jpg?resize=880%2C496&ssl=1)
ဆိုင်ကယ်အများအပြားကို အကြမ်းဖက်စစ်ကောင်စီမှ ခိုးယူသုံးစွဲခဲ့ပြီး ဆိုင်ကယ်အချို့မှာ ရိုက်ချိုးဖျက်စီးခံခဲ့ရသည်ကို တွေ့ရကြောင်း၊ ထုတ်ယူနိုင်ခဲ့သော ဆိုင်ကယ်(၁၆)စီးအနက် (၆)စီးအား မိဘပြည်သူပိုင်ရှင်ထံ ပြန်လည်အပ်နှံပြီးစီးခဲ့ကြောင်း ဖော်ပြထားသည်။
“စစ်ကောင်စီက အင် အားသုံးထိုးစစ်ဆင်လာတော့ ဒေသခံတွေ ရွာလုံးကျွတ် ထွက်ပြေးခဲ့ရတယ်။အများစုကအဝတ်တစ်ထည်ကိုယ်တစ်ခုနဲ့ ပြေးရတော့ ပစ္စည်းတွေကျန်ခဲ့ကြတာ။အခုထိလည်း ထိတွေ့မှုက ရှိသေးတော့ ဘယ်သူမှ ပြန်မလာနိုင်ကြသေးဘူး”ဟု DMO Local PDF တာဝန်ရှိသူက လူထုနွေဦးသို့ ပြောသည်။
![(ပြည်သူများ၏ ဆိုင်ကယ်များကို ဒေသခံပြည်သူ့ကာကွယ်ရေးတပ်များက ထုတ်ယူလာပြီးပြန်အပ်ရန် ပြင်ဆင်ထားစဥ်။ ဓါတ်ပုံ-DMO- Local PDF)](https://i0.wp.com/www.ludunwayoo.com/wp-content/uploads/2022/06/288845007_404336041755854_5154623681848924452_n.jpg?resize=880%2C496&ssl=1)
ယခုနှစ် မတ်လ ကစ၍ အိမ်ခြေ ၁,၀၀၀ ဝန်းကျင်ရှိသောဒေါငံခါးကျေးရွာကို စစ်ကောင်စီ တပ်က ဝင်ရောက်တပ်စွဲခဲ့ခြင်း ဖြစ်သည်။
လက်ရှိထုတ်ယူနိုင်ခဲ့သော ဆိုင်ကယ်(၁၆)စီးအနက် (၆)စီးအား ပြည်သူပိုင်ရှင်ထံ ပြန်လည်အပ်နှံပြီးစီးခဲ့ကာ ကျန်ရစ်သောဆိုင်ကယ်များကို ပိုင်ရှင်ထံ ဆက်လက် အပ်နှံသွားမည်ဖြစ်ကြောင်း ဒီးမော့ဆို PDFက အသိပေးထားသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)