နယ်မြေစိုးမိုးမှုအနေနဲ့ စစ်ကိုင်းတိုင်းနဲ့မကွေးတိုင်း မြောက်ပိုင်းမှာရှိတဲ့ အဓိက လမ်းမကြီးတွေရဲ့ ၉၀ ရာခိုင်နှုန်းခန့်ကို PDF တွေက စိုးမိုးထိန်းချုပ်နိုင်ပြီလို့ ဒီနေ့ဇွန်လ ၂၁ ရက်ညနေပိုင်းမှာကျင်းပတဲ့ အမျိုးသားညီညွှတ်ရေးအစိုးရ(NUG) ရဲ့ သတင်းစာရှင်းလင်းပွဲမှာ ထုတ်ဖော်ပြောဆိုလိုက်ပါတယ်။
ဒါအပြင် စစ်ကိုင်းတိုင်းနဲ့ မကွေးတိုင်းမြောက်ပိုင်းက ကျေးရွာတွေရဲ့ ၈၀ ရာခိုင်နှုန်းကို စိုးမိုးထားနိုင်ပြီလို့လည်း NUG သတင်းထုတ်ပြန်ရေးအဖွဲ့ရဲ့အတွင်းရေးမှူး ဦးနေဘုန်းလတ်က သတင်းစာရှင်းလင်းပွဲမှာပြောပါတယ်။
ဒီလို စိုးမိုးထားတဲ့ လမ်းမကြီးတွေမှာ သွားလာနေတဲ့ ယာဉ်တွေကို လုံခြုံရေးအတွက် PDF တပ်ဖွဲ့တွေက စစ်ဆေးနေတဲ့ ဓာတ်ပုံမှတ်တမ်းတွေကို သတင်းစာရှင်းလင်းပွဲမှာ ပြသခဲ့ပါသေးတယ်။
PDF တွေအနေနဲ့ အရင် ပြောက်ကျားစစ်ဆင်နွှဲရာကနေ လက်ရှိအချိန်မှာလိုအပ်ရင် တပ်ရင်းအလိုက် ရင်ဆိုင်တိုက်ပွဲဆင်နွှဲနိုင်တဲ့အနေအထားကိုရောက်လာပြီလို့လည်း သတင်းစာရှင်းလင်းပွဲမှာအသိပေးပါတယ်။
မန္တလေးတိုင်း မြောက်ပိုင်း ၊ တနင်္သာရီတိုင်းတွေမှာ PDF တွေရဲ့ လှုပ်ရှားမှုပိုမိုအားကောင်းလာပြီး ရန်ကုန်တိုင်း ၊ပဲခူးတိုင်း ၊ဧရာဝတီတိုင်း ၊နေပြည်တော်တို့မှာ မြို့ပြပြောက်ကျားတွေလှုပ်ရှားမှုတွေ ဆက်လက်ရှင်သန်နေ ဆဲလို့ပြောပါတယ်။
ပြည်နယ်တွေအနေနဲ့ ကချင်ပြည်နယ် ၊ကရင်နီ (ကယားပြည်နယ် ) ၊ ကရင်ပြည်နယ် ၊ချင်းပြည်နယ် ၊မွန်ပြည်နယ်မြောက်ပိုင်းတွေမှာ မဟာမိတ် တိုင်းရင်းသားလက်နက်ကိုင်အဖွဲ့အစည်းတွေ၊ PDF တွေရဲ့စိုးမိုးမှု တိုးပွားနေတယ်လို့သိရပါတယ်။
ရခိုင်ပြည်နယ် ၊ရှမ်းပြည်နယ်မြောက်ပိုင်းတွေမှာ တိုင်းရင်းသားလက်နက်ကိုင်အဖွဲ့အစည်းတွေရဲ့နယ်မြေစိုးမိုးမှုအားကောင်းနေတယ်လို့လည်း ဒီနေ့ သတင်းစာရှင်းလင်းပွဲမှာအသိပေးသွားပါတယ်။
