လတ်တလော ဖြစ်ပွားနေသည့် တိုက်ပွဲသတင်းများကို ထုတ်ပြန်ကြေညာမည်ဖြစ်၍ အတည်မပြုနိုင်သော သတင်းများအား ဖြန့်ဝေခြင်းမပြုခြင်းအားဖြင့် ပူးပေါင်းဆောင်ရွက်ပေးရန် ကရင်အမျိုးသားကာကွယ်ရေးတပ်(KNDO)က ယနေ့ မေတ္တာရပ်ခံချက်ထုတ်ပြန်သည်။
KNDO နှင့် ပူးပေါင်းတပ်ဖွဲ့များသည် မြ၀တီမြို့နယ် ဝေါ်လေဒေသ ရှိ စစ်ကောင်စီ၏ ဥကရစ်ထ တပ်စခန်း သိမ်းပိုက်နိုင်ရေး ဇွန်လ ၂၆ရက်မှစ၍ တိုက်ခိုက်နေခြင်းဖြစ်သည်။
ယမန်နေ့ ညနေပိုင်းက စစ်ကောင်စီစခန်းကုန်းအချို့ကို သိမ်းပိုက်ထားနိုင်ပြီး ယနေ့ တိုက်ပွဲဆက်လက် ဖြစ်ပွားနေသည်။
လက်ရှိ မြေပြင်အခြေအနေနှင့်ပတ်သက်၍ လူမှုကွန်ရက် စာမျက်နှာများတွင် ပြန့်နှံ့နေသော ဓာတ်ပုံများနှင့် ဗီဒီယိုများအား KNDOအနေဖြင့် အတည်ပြုနိုင်ခြင်းမရှိသေးကြောင်း ဖော်ပြထားသည်။
လက်ရှိဖြစ်နေသည့် မြေပြင်တိုက်ပွဲ အခြေအနေနှင့်ပတ်သက်ပြီး KNDO ဗဟိုမှ ထုတ်ပြန်မည့်သတင်းမှာ အမှန်ဖြစ်ကြောင်း ဖော်ပြခဲ့သည်။ KNDO အနေဖြင့် တိုက်ပွဲဖြစ်ပွားချိန် ဇွန်လ ၂၆ရက်မှ ယနေ့အထိ တိုက်ပွဲအခြေအနေ တစ်စုံတရာ ထုတ်ပြန်ခြင်းမရှိသေးပေ။
