▪️တိုက်ပွဲပြင်းထန်လာနိုင်၍ ကူညီပံ့ပိုးကြရန် မင်းတပ် CDF အကူအညီတောင်း
မင်းတပ်မြို့နယ် ချင်းကာကွယ်ရေးတပ်(CDF)နှင့် စစ်ကောင်စီတပ်တို့ ယနေ့မွန်းလွဲပိုင်းမှစ၍ တိုက်ပွဲ ၂ကြိမ်ထပ်မံ ဖြစ်ပွားခဲ့ရာ စစ်ကောင်စီတပ်မှ လေးဦးသေဆုံးပြီး ဒဏ်ရာရသူများရှိခဲ့ကြောင်း မင်းတပ် CDFက ထုတ်ပြန်သည်။
မင်းတပ် CDFနှင့် စစ်ကောင်စီတပ်တို့သည် ယနေ့(ဇွန်လ ၂၉ ရက်)နံနက် ၉နာရီမှစ၍ မင်းတပ်မြို့နယ်၌ တိုက်ပွဲဖြစ်ပွားခဲ့သည်။ နံနက်ပိုင်း တိုက်ပွဲအခြေအနေကို CDF က ဖော်ပြထားခြင်းမရှိသော်လည်း
ယနေ့ ညနေ၂နာရီအချိန်တွင် ဖြစ်ပွားခဲ့သည့် တိုက်ပွဲ၌ စစ်ကောင်စီတပ်မှ တစ်ဦးသေဆုံးပြီး ဒဏ်ရာရသူများ ရှိခဲ့သည်ဟု ထုတ်ပြန်သည်။
ထို့ပြင် မွန်းလွဲ ၃နာရီ၌တိုက်ပွဲပြန်လည်ဖြစ့်ပွားရာ စစ်ကောင်စီတပ်မှ သုံးဦးထပ်သေပြီး ဒဏ်ရာရသူများလည်း ရှိခဲ့ကြောင်း ဖော်ပြထားသည်။
တိုက်ပွဲအတွင်း မင်းတပ် CDFမှ ရဲဘော်တစ်ဦးလက်နက် ကြီးထိမှန်ကျဆုံးခဲ့ပြီး ရဲဘော်တစ်ဦး ဒဏ်ရရခဲ့သည်ဟု ထုတ်ပြန်သည်။
ထီးလင်းမြို့နယ်မှ မင်းတပ်နယ်သို့ ဝင်ရောက်လာသည့် စစ်ကောင်စီတပ်များသည် မင်းတပ်မြို့နယ် ပလုံတွီရွာ၌ ယနေ့ ညနေပိုင်း၌ ဝင်ရောက်တပ်စွဲခဲ့ရာ တိုက်ပွဲ ဆက် လက် ဖြစ်နိုင်ခြေရှိသောကြောင့် ကူညီပံ့ပိုးမှုများ ပြုလုပ်ပေးကြရန် မင်းတပ် CDFက အကူအညီ တောင်း ခံထားသည်။
စစ်ကောင်စီတပ်များသည် တိုက်ပွဲစဖြစ်သည့်မနက်ပိုင်းတွင် လက်နက်ကြီးများဖြင့် ကျေးရွာများ ရှိရာသို့ရမ်းသမ်းပစ်ခတ်ခဲ့ရာ ကလေးငယ်တစ်ဦးထိမှန်ပြီးအသက်ဆုံးရှုံးခဲ့ရသည်။
