ထောင်တွင်းတရားရုံးကနေအပြန် စောင့်ဖမ်းတာကြောင့် မန္တလေးမှာရှေ့နေတွေ ရုံးချိန်သွားဖို့အခက်တွေ့နေ

မန္တလေးမှာ ရှေ့နေတွေကိုပစ်မှတ်ထားဖမ်းဆီးနေပြီး အိုးဘိုထောင်တွင်းတရားရုံးကနေအပြန်မှာစောင့်ဖမ်းတာတွေကြောင့် ရုံးချိန်းသွားဖို့အတွက် ရှေ့နေတွေအခက်တွေ့နေတယ်လို့သိရပါတယ်။

စစ်အုပ်စုဟာ နွေဦးတော်လှန်ရေးကာလအတွင်း နိုင်ငံရေးပုဒ်မတွေနဲ့ ဖမ်းခံရသူတွေဘက်က လိုက်ပါဆောင်ရွက်ပေးနေတဲ့ ရှေ့နေတွေကို မန္တလေးမှာ ဖမ်းဆီးတာတွေရှိခဲ့တာပါ။

အိုးဘိုထောင် တရားခွင်ကနေ အပြန် မှာ ဖမ်းခံရသူတွေ ထဲမှာ မန္တလေးတိုင်းဝန်ကြီးချုပ် ဒေါက်တာဇော်မြင့်မောင်ရဲ့ ရှေ့နေ ပါဝင်သလို ပြီးခဲ့တဲ့ ရက်ပိုင်းကတင် ရှေ့နေ ၃ ဦး ထောင်တွင်းတရားရုံးကအပြန် ဖမ်းခံလိုက်ရပါသေးတယ်။

ဒီလို ပစ်မှတ်ထားဖမ်းဆီးမှုတွေကြောင့် ရှေ့နေအချို့ တိမ်းရှောင်နေကြရတယ်လို့လည်းသိရပါတယ်။

ဒါကြောင့် လတ်တလောအခြေအနေမှာ ထောင်တွင်းရုံးချိန်းကို မသွားရောက်နိုင်ဘဲ ခွင့်တိုင်တာမျိုးတွေရှိနေတယ်လို့ ရှေ့နေအသိုင်းအဝိုင်းနဲ့နီးစပ်သူတွေထံကသိရပါတယ်။

ပြီးခဲ့တဲ့ တပတ်အတွင်းမှာတင် မန္တလေးမှာ ရှေ့နေ ၅ ဦး ဖမ်းဆီးခံခဲ့ရပါတယ်။ ဖမ်းမိတဲ့သူတွေကို စစ်အုပ်စုဟာ PDF နဲ့ဆက်နွယ်တယ်ဆိုပြီး အကြမ်းဖက်ပုဒ်မနဲ့ အမှုတပ်တာတွေလည်းလုပ်ဆောင်နေတာပါ။

လက်ရှိအချိန်ထိ မန္တလေးမှာ ဖမ်းခံရတဲ့ရှေ့နေ ဦးရေဟာ ၁၅ ဦးခန့်ရှိနေပါပြီ။

စစ်ကောင်စီဟာ ဆန့်ကျင်တဲ့သူတွေကို ဖမ်းဆီးတရားစွဲဆိုရာမှာ အပြင်တရားရုံးကို မထုတ်ဘဲ ထောင်တွင်းမှာပဲ တရားရုံး လုပ်ကာ စစ်ဆေးအမိန့်ချနေတာပါ။

ရှေ့နေ အသိုင်းအဝိုင်းဆီက သိရတာကတော့ စစ်ကောင်စီရဲ့ထောင်တွင်းတရားရုံးတွေဟာ တရားစီရင်သယောင်ဟန်ပြသာဖြစ်ပြီး အမှုရင်ဆိုင်ရသူအားလုံးနီးပါး လွတ်မြောက်တာမရှိဘဲ စွဲဆိုခံရတဲ့ ပုဒ်မရဲ့အမြင့်ဆုံးပြစ်ဒဏ်ကိုချလေ့ရှိတယ်လို့သိရပါတယ်။