မုံရွာမြို့ အနောက်မြောက်တိုင်းစစ်ဌာနချုပ်(နမခ)မှ ထွက်လာသော စစ်ကောင်စီတပ်မှ ယာဥ်နှစ်စီးကို ညီနောင်မဟာမိတ်အဖွဲ့များနှင့်အတူ မိုင်းဆွဲတိုက်ခိုက်ခဲ့ကြောင်း မြင်းမူမြို့နယ်ပြည်သူ့ကာကွယ်ရေးတပ်ဖွဲ့(MMUPDF)က ယနေ့(ဇူလိုင် ၇)ထုတ်ပြန်သည်။
ယနေ့ညနေ ၅ နာရီ ၄၀မိနစ်ခန့်က မုံရွာ(နမခ)မှ ထွက်လာသော စစ်ကားနှစ်စီးကို ထီးဆောင်းနှင့် ကန်ဖျားဇရပ်ကြားတွင် မိုင်းဆွဲတိုက်ခိုက်ခဲ့ရာ ခေါင်းပြာ၊ မိုးကာအစိမ်းဖြင့်အုပ်ထားသော ယာဥ်တစ်စီးအား ထိမှန်ခဲ့ကြောင်း ဖော်ပြသည်။
ထို့ကြောင့် ယာဥ်မှာပျက်စီးသွားပြီး စစ်ကောင်စီတပ်မှ အများအပြားဒဏ်ရာရသည့်အပြင် ထိ ခိုက်သေဆုံးမှုရှိနိုင်သော်လည်း အတိအကျမသိရသေးဟု MMUPDFက ဆိုသည်။
အထက်ပါတိုက်ခိုက်မှုကို MMUPDFနှင့် Black Eagle PDF ၊ Black Hawk Force Myinmu ၊ People Guerrilla Commando-MMU နှင့် Myinmu Civil Revolution Force တို့ ပူးပေါင်းတိုက်ခိုက်ခဲ့ကြောင်း အသိပေးသည်။
MMUPDFနှင့် ညီနောင်မဟာမိတ်များမှ ဇွန်လ ၂၇ ရက်က စစ်ကိုင်းမှ မုံရွာမြို့ဘက်ထွက်လာသော စစ်ကောင်စီတပ်မှ ယာဥ်လေးစီးကို မြင်းမူနှင့် ထီးဆောင်းကြား မိုင်းဆွဲတိုက်ခိုက်ခဲ့ရာ စစ်ကောင်စီတပ်မှ နှစ်ဦးသေဆုံးခဲ့သည်။
