လူထုခေါင်းဆောင်၊ နိုင်ငံတော်၏အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်၏ ၇၇ နှစ်ပြည့်မွေးနေ့အတွက် စင်ကာပူနိုင်ငံခြားရေးဝန်ကြီးက ဆုမွန်ကောင်းတောင်းသည်။
“ချစ်ခင်ရတဲ့ဒေါ်အောင်ဆန်းစုကြည်အတွက် ပျော်ရွှင်ဖွယ် ၇၇ နှစ်ပြည့်မွေးနေ့ဖြစ်ပါစေလို့ ဆန္ဒပြုပါတယ်။ စိတ်ချမ်းသာ၊ ကိုယ်ကျန်းမာပြီး လိုအင်ဆန္ဒတွေလည်း ပြည့်၀ပါစေ” ဟု စင်ကာပူနိုင်ငံခြားရေးဝန်ကြီး ဗီဗီယန်ဘလာခရစ်နန်က ၎င်း၏လူမှုကွန်ရက်၌ ရေးသားထားသည်။
နိုင်ငံတော်၏အတိုင်ပင်ခံပုဂ္ဂိုလ်ဒေါ်အောင်ဆန်းစုကြည် စင်ကာပူသို့သွားရောက်ခဲ့စဉ် နိုင်ငံခြားရေးဝန်ကြီးဘလာခရစ်နန်က ၎င်း၏နေအိမ်၌ ညစာဖြင့်တည်းခင်းဧည့်ခံခဲ့ပြီး ၎င်း၏ ဇနီး နှင့်အတူ ဒေါ်အောင်ဆန်းစုကြည်တို့ ရိုက်ကူးထားသော အမှတ်တရဓာတ်ပုံဖြင့် ဆုမွန်ကောင်းတောင်း ထားခြင်းဖြစ်သည်။
အာဆီယံအမွေအနှစ်နှင့်သမိုင်း(ASEAN Heritage & History)ဖေ့စ်ဘွတ်စာမျက်နှာကလည်း ယနေ့ကျရောက်သော ဒေါ်အောင်ဆန်းစုကြည်၏ မွေးနေ့အတွက် ယမန်နေ့ညနှင့် ယနေ့ နံ နက်တွင် နှစ်ကြိမ်ဆုမွန်ကောင်းတောင်းပေးထားသည်။
ဒေါ်အောင်ဆန်းစုကြည်နှင့် ကျောင်းသူ၊ ကျောင်းသား ကလေးငယ်များ ပြုံးပျော်ရွှင် နေသောဓာတ်ပုံများဖြင့် ဓာတ်ပုံတစ်ပုံက စကားလုံးပေါင်း ထောင်သောင်းမက ပြောပြနေသည်ကို သင်ယုံကြည်ပါသလား စာသားအပြင် မြန်မာပြည်သူများ၏ မျှော်လင့်ချက်နှင့်အလင်းရောင်၊ နိုင်ငံ့မိခင် စာသားများကိုလည်း ရေးသားဖော်ပြထားသည်။
ထိုသို့ ဒေသတွင်းခေါင်းဆောင်အချို့၏ ဒေါ်အောင်ဆန်းစုကြည် မွေးနေ့ဆုမွန်ကောင်းတောင်း ထားမှုအပေါ် နိုင်ငံရေးသမားတစ်ဦးက“မြန်မာ့အရေးအတွက်အာဆီယံခေါင်းဆောင်တွေကြားမှာ အမြင်တွေကိုယ်စီရှိနေတယ်။ စကစ မည်သို့ပင်မတရားစွပ်စွဲ အကျဉ်းချထားတဲ့ခေါင်းဆောင်တွေအပေါ် စကစကိုဆန့်ကျင်ပြီး တန်ဖိုးထားကြောင်းပြတယ်။စကစ မတရားစွပ်စွဲတာသာဖြစ်တယ် ဆိုတာရော ဒီခေါင်းဆောင်တွေရဲ့အရေးပါမှုကိုရောညွှန်ပြတဲ့သဘောပဲ” ဟု မှတ်ချက်ပြုသည်။
