စစ်ကိုင်းတိုင်းတွင်စစ်ကောင်စီနှင့်ပူးပေါင်း၍ ပြည်သူထူထုနှင့် PDF အားအကြမ်းဖက်တိုက်ခိုက်နေသည့် ရှမ်းနီလက်နက်ကိုင်အဖွဲ့(SNA)ထံသို့ ကရင်နယ်ခြားစောင့်တပ်ဖွဲ့ BGF က လက်နက်များပေးပို့နေကြောင်း စစ်ကိုင်းတိုင်းအခြေစိုက် ပြည်သူ့ကာကွယ်ရေးတပ်ဖွဲ့အချို့ကပြောသည်။
“ရှမ်းနီတပ်ဖွဲ့ကို စစ်ကောင်စီက လက်နက်ထောက်ပံ့နေတာ။ BGFကနေ တဆင့် ဒီဒေသအထိ လာပို့တဲ့သတင်းကို ကျွန်တော်တို့အခိုင်အမာရထားတယ်”ဟုဖောင်းပြင်မြို့နယ်ပြည်သူ့ကာကွယ်ရေးတပ်ဖွဲ့မှတာဝန်ရှိသူတစ်ဦးကပြောသည်။
ရှမ်းနီအမျိုးသားများတပ်မတော်(Shanni Nationalities Army-SNA)ဟုဆိုကာ ဖွဲ့စည်းထားသော ရှမ်းနီတပ်ဖွဲ့သည် စစ်တပ်က နိုင်ငံတော်အာဏာသိမ်းပြီးနောက်ပိုင်း ယခင်ကထက် လက်နက်ပိုမိုများပြားလာသည်။ယခုအခါ အကြမ်းဖက်စစ်ကောင်စီတပ်နှင့်ပူးပေါင်းနေကြောင်း ဟုမ္မလင်း၊ ဖောင်းပြင်နှင့် မော်လိုက်မြို့မှ ဒေသခံများနှင့် ပြည်သူ့ကာကွယ်ရေးရဲဘော်များက ပြောသည်။
ဇွန်လနှင့် ဇူလိုင်လအတွင်း ဖောင်းပြင်နှင့်မော်လိုက်မြို့မှလုပ်ငန်းရှင်အချို့ထံ ရှမ်းနီတပ်ဖွဲ့က ငွေကျပ်သိန်းရာသည်အထိ ဆက်ကြေးတောင်းနေသည်ဟုဆိုကာ ဒေသခံများနှင့် ပြည်သူ့ကာကွယ်ရေးတပ်ဖွဲ့များကပြောသည်။
ထိုအပြင်ကသာခရိုင်၊ဗန်းမောက်မြို့ပေါ်နှင့်ကျေးရွာများမှလုပ်ငန်းရှင်များ၊ဈေးဆိုင်များ ၊ဒေသခံများထံ ရှမ်းနီတပ်ဖွဲ့က ဆက်ကြေးကောက်ခံခဲ့ပြီး ဗန်းမောက်မြို့ပေါ်တွင်ဆပ်ကြေးကို မြို့ပေါ်ရှိ အောင်ကမ္ဘာသိန်း ( AKBT)စားသောက်ဆိုင်နှင့် Royal Golden City ဟိုတယ်မှတာဝန်ရှိသူများက လက်ခံ ပေးသည်ကိုသိရှိရကြောင်းဗန်းမောက်မြို့နယ်ပကဖ က ဇူလိုင် ၆ ရက်တွင်ထုတ်ပြန်ထားသည်။
ပြည်သူများထံမှ ဆက်ကြေးကောက်ခြင်းကို ရပ်တန့်ရန်နှင့်ကောက်ခံထားပြီးသော ငွေကြေးများကိုမူလပိုင်ရှင်များထံ အမြန်ဆုံးပြန်လည်ပေးအပ်ရန် ရှမ်းနီတပ်ဖွဲ့(SNA)အားဗန်းမောက်မြို့နယ်ပြည်သူ့ကာကွယ်ရေးတပ်ဖွဲ့ (ပကဖ)က သတိပေးချက် ထုတ်ပြန်ထားသည်။
ထို့အပြင် စစ်ကိုင်းတိုင်းအတွင်း မြို့နယ်အချို့၌ စစ်ကောင်စီစစ်ကြောင်းထိုးရာတွင် ရှမ်းနီတပ်ဖွဲ့က လိုက်ပါ၍အကြမ်းဖက်နေကြောင်းလည်းဒေသခံများကပြောသည်။
ပြည်သူများကို ညှင်းပန်းနှိပ်စက်ခြင်း၊ဆက်ကြေးကောက်ခြင်း၊ အတင်းအဓမ္မစေခိုင်းခြင်းများပြုလုပ်သောမည်သည့်လက်နက်ကိုင်အဖွဲ့ကိုမဆို အကြမ်းဖက် စစ်ကောင်စီနှင့်တစ်တန်းတည်သတ်မှတ်၍ ပြည်သူ့ဆန္ဒအတိုင်းဆောင်ရွက်သွားမည်ဟု ဗန်းမောက် ပကဖ ကထုတ်ပြန်ထားသည်။
စစ်ကိုင်းတိုင်း မော်လိုက်နှင့် ဖောင်းပြင်ဒေသသို့ ဆက်ကြေးလာကောက်သည့် ရှမ်းနီတပ်ဖွဲ့၏ အဓိက တာဝန်ရှိသူမှာ စိုင်းပြူးဆိုသူဖြစ်ကြောင်း ပြည်သူ့ကာကွယ်ရေးရဲဘော်များကပြောသည်။ စိုင်းပြူးသည် စစ်ကောင်စီ၊ BGF တို့နှင့် ချိတ်ဆက်ကာ လက်နက်ပွဲစားအဖြစ်လည်း လှုပ်ရှားနေသူဟု ဆိုကြသည်။ယခုသတင်းအတွက်ရှမ်းနီတပ်ဖွဲ့နှင့်စိုင်းပြူးထံသို့ဆက်သွယ်ရန်ကြိုးစားခဲ့သော်လည်းဆက်သွယ်မရခဲ့ပါ။
