စစ်ကိုင်းတိုင်း၊ မုံရွာမြို့ရှိ စီးပွားရေးတက္ကသိုလ်ဝင်းအတွင်း တပ်စွဲထားသော အကြမ်းဖက်စစ်ကောင်စီတပ်အား PDFတပ်ပေါင်းစုက ပစ်ခတ်တိုက်ခိုက်ခဲ့ရာ စစ်အုပ်စုဘက်က ခြောက်ဦးသေဆုံးကြောင်း အနောက် မြောက်တိုင်းမဟာမိတ် PDF တပ်ပေါင်းစုက သတင်းထုတ်ပြန်သည်။
ယနေ့ (ဇူလိုင်၁၉ရက်) နံနက် ၁နာရီခွဲက မုံရွာစီးပွားရေးတက္ကသိုလ်ကျောင်းဝင်းအတွင်း တပ်စွဲထားသော စစ်ကောင်စီတပ်၏ စစ်သားနှင့်ရဲများအား လက်နက်ကြီး၊ လက်နက်ငယ်များဖြင့် နာရီဝက်ခန့် ဝိုင်းဝန်းပစ်ခတ်တိုက်ခိုက်ခဲ့ခြင်းဖြစ်ကြောင်း အနောက်မြောက်တိုင်းမဟာမိတ် PDF တပ်ပေါင်းစု၏ ထုတ်ပြန်ချက်တွင် ဖော်ပြသည်။
စစ်အုပ်စုဘက်က ခြောက်ဦးသေဆုံးပြီး ထိခိုက်ဒဏ်ရာရသူများ အပြားရှိနိုင်ကြောင်း၊ မဟာမိတ်ရဲဘော်များ အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်း PDF တပ်ပေါင်းစုက အသိပေးသည်။
ဖြစ်စဥ်နှင့်ပတ်သက်၍ အနောက်မြောက်တိုင်းမဟာမိတ် PDF တပ်ပေါင်းစု၏ တာဝန်ရှိသူက “သူတို့ဘက်ကလည်း RPG ၊ (၆၀) မမတွေရယ်၊ လက်နက်ငယ်တွေနဲ့ ပြန်ပစ်ပါတယ်ဗျ။ ထိတာပြုတာတော့မရှိဘူး။ အကြမ်းဖက်စစ်တပ်ဘက်ကတော့ ညနေကထိ သတင်း ရတာတော့ ခြောက်ကောင်သေပြီး ဒဏ်ရာရသူအများအပြားရှိတယ်လို့သိရပါတယ်ဗျ။”ဟု ပြောသည်။
သို့သော် စစ်ကောင်စီတပ်၏ ထိခိုက်သေဆုံးမှုအခြေအနေအား ထပ်မံအတည်ပြုနိုင်ခြင်း မရှိသေးပါ။
အထက်ပါစစ်ဆင်ရေးအား အနောက်မြောက်တိုင်းမဟာမိတ် PDF တပ်ပေါင်းစု၏တပ်ရင်း(၁)၊ တပ်ခွဲ(၁) People’s Defence Force – South Monywa၊ တပ်ရင်း(၁)၊ တပ်ခွဲ(၂) Black Dragon – Special Task Force၊ တပ်ရင်း(၁)၊ တပ်ခွဲ(၂)၊ တပ်စု(၁) Anyar Defence Force (A.D.F)၊ တပ်ရင်း(၁)၊ တပ်ခွဲ(၃) God of Monywa People’s Defence Force & Red Eagle People’s Defence Force၊ တပ်ရင်း(၁)၊ တပ်ခွဲ(၄) Monywa Fighter Group & Golden Eagle Force – Monywa၊ တပ်ရင်း(၃)၊ တပ်ခွဲ(၁) Monywa Ranger Group – Truth Army၊ တပ်ရင်း(၃)၊ တပ်ခွဲ(၂) Monywa Red Peacock၊ တပ်ရင်း(၃)၊ တပ်ခွဲ(၃) People’s Defence Force – Yar Za Than၊ တပ်ရင်း(၃)၊ တပ်ခွဲ(၄) Springs Dove တို့ စုပေါင်းတိုက်ခိုက်ခဲ့ကြခြင်းဖြစ်ကြောင်း ၎င်းတို့ကအသိပေးသည်။
