စစ်ကောင်စီတပ်တွေအနေနဲ့ စစ်တိုက်ချင်ရင် စစ်သားတွေပီပီ သတ္တိရှိရှိ၊ သိက္ခာရှိရှိနဲ့ မျက်နှာချင်းဆိုင်တိုက်ပါလို့ ကော်ဘရာစစ်ကြောင်းမှူး ဗိုလ်ဒါဘောက စစ်ကောင်စီတပ်ကို သတင်းစကားပါးလိုက်ပါတယ်။
ကေအဲန်ယူ-ဒူးပလာယာခရိုင် တပ်မဟာ ၆ ဒေသဖြစ်တဲ့ မြ၀တီ-ဝေါ်လေ ကားလမ်းမပေါ်ရှိ သုံးထပ်ကွေ့မှာ ကော်ဘရာစစ်ကြောင်းနဲ့ စစ်ကောင်စီတပ်တို့အကြား ဇူလိုင်(၇)ရက်ကစတင်ပြီး ဇူလိုင်(၁၂)ရက်အထိ ထိတွေ့တိုက်ပွဲတွေဖြစ်ပွားခဲ့တာပါ။
![ကော်ဘရာစစ်ကြောင်း](https://i0.wp.com/www.ludunwayoo.com/wp-content/uploads/2022/07/293760312_425150103007781_6189751994420638302_n.jpg?resize=880%2C498&ssl=1)
စစ်ကောင်စီတပ်ဘက်က မြ၀တီ-ဝေါ်လေ ကားလမ်းမကြီးကို တစ်ဖက်သတ်ပိတ်ဆို့ခဲ့မှုကြောင့် ဒေသခံပြည်သူလူထုရဲ့ စားဝတ်နေရေး လွန်စွာကြပ်တည်းခဲ့ရပြီး အဲ့ဒီအတွက် ကော်ဘရာစစ်ကြောင်းက ဇူလိုင်လ (၁၂) ရက် ညနေပိုင်းကစတင်ကာ ပြည်သူလူထု အေးချမ်းလုံခြုံစွာပြန်လည်နေထိုင်နိုင်ဖို့၊ အသက်ရှင်ရပ်တည်နိုင်ဖို့အတွက် တိုက်ပွဲဖြစ်ပွားရာဒေသနဲ့ ဆက်စပ်နေရာတွေကို နယ်မြေရှင်းလင်းရေး ဆောင်ရွက်ခဲ့တယ်လို့ ကော်ဘရာစစ်ကြောင်းက သတင်းထုတ်ပြန်ထားပါတယ်။
ဒေသခံပြည်သူလူထုတွေရဲ့ စားဝတ်နေရေး၊ စီးပွားရေး၊ လူမှုရေးနဲ့ အသက်ရှင်ရပ်တည်နိုင်ရေး၊ နေထိုင်သွားလာရေးအဆင်ပြေစေဖို့အတွက် မြဝတီ – ဝေါ်လေ ကားလမ်းမကြီးတစ်လျှောက်က စစ်ကောင်စီတပ်က ပိတ်ဆို့ထားတဲ့ အတားအဆီးအပျက်အစီးတွေ ဖယ်ရှားရှင်းလင်းခဲ့ပြီး ဇူလိုင်(၁၆)ရက် ညနေပိုင်းမှာ အဆိုပါလမ်းမကြီးကို ပြန်လည်ဖွင့်လှစ်ပေးခဲ့တယ်လို့ ကော်ဘရာစစ်ကြောင်းက ဆိုပါတယ်။
![ကော်ဘရာစစ်ကြောင်း](https://i0.wp.com/www.ludunwayoo.com/wp-content/uploads/2022/07/293186972_425150116341113_4913523137700672953_n.jpg?resize=880%2C481&ssl=1)
![ကော်ဘရာစစ်ကြောင်း](https://i0.wp.com/www.ludunwayoo.com/wp-content/uploads/2022/07/293734842_425149926341132_5268219331930236373_n.jpg?resize=880%2C587&ssl=1)
![ကော်ဘရာစစ်ကြောင်း](https://i0.wp.com/www.ludunwayoo.com/wp-content/uploads/2022/07/294307394_425150086341116_5982429573304949096_n.jpg?resize=880%2C632&ssl=1)
ဒီလို ကော်ဘရာစစ်ကြောင်းက ပြည်သူလူထုရဲ့လူမှုစီးပွားအတွက် ဆောင်ရွက်ပေးမှုအပေါ် အခွင့်ကောင်းယူပြီး စစ်ကောင်စီတပ်ဟာ ယုတ်မာပက်စက်တဲ့အကြံနဲ့ ဒီကနေ့ မနက် ဇူလိုင်(၁၇)ရက်မှာ မြ၀တီ-ဝေါ်လေ ကားလမ်းမကြီးပေါ်မှာ လက်နက်ကြီးတွေနဲ့ ပစ်ခတ်လျက်ရှိတယ်လို့ ထုတ်ပြန်ချက်မှာပါရှိပါတယ်။
စစ်ကောင်စီရဲ့ ယုတ်မာတဲ့လုပ်ရပ်တွေဟာ ပြည်သူလူထုရဲ့ အသက်အိုးအိမ်စည်းစည်အပေါ် ထိခိုက်မှုတွေရှိလာနိုင်တဲ့အတွက် ကော်ဘရာစစ်ကြောင်းအနေနဲ့ လွန်စွာစိုးရိမ်ပူပန်လျက်ရှိပြီး ပြည်သူလူထုအေးချမ်း လုံခြုံစွာ သွားလာနိုင်ခြင်းမရှိတဲ့အပေါ် ကော်ဘရာစစ်ကြောင်းမှူးအနေနဲ့ များစွာစိတ်မကောင်းဖြစ်ခဲ့ရတယ်လို့ ထုတ်ပြန်ချက်ထားချက်အရ သိရပါတယ်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)