မန္တလေးတိုင်း၊ မလှိုင်မြို့နယ်တွင် ယနေ့နံနက်ပိုင်းက အကြမ်းဖက်စစ်ကောင်စီလက်အောက်ခံ ရပ်ကျေးအုပ်ချုပ်ရေးမှူးတစ်ဦးအား ပစ်ခတ်ရှင်းလင်းခဲ့ကြောင်း PDFတောင်သာက သတင်းထုတ်ပြန်သည်။
ယနေ့ (ဇူလိုင် ၂၆ရက်)နံနက် ၈နာရီကျော်က မလှိုင်မြို့နယ်၊ ရုံတောကျေးရွာနေ အကြမ်းဖက်စစ်ကောင်စီ၏ ရပ်ကျေးအုပ်ချုပ်ရေးမှူးလည်းဖြစ်၊ သမဝါယမရုံးစာရေးလည်းဖြစ်သူ ဦးဝင်းဆွေဆိုသူအား သေနတ်နှစ်ချက်ပစ်ခတ်ကာ ရှင်းလင်းခဲ့ပြီး သေဆုံးသွားကြောင်း PDFတောင်သာ၏ ထုတ်ပြန်ချက်တွင် ဖော်ပြသည်။
ရပ်ကျေးအုပ်ချုပ်ရေးမှူး သမစာရေးအား ရှင်းလင်းခဲ့ခြင်းနှင့်ပတ်သက်၍ PDF တောင်သာ တာဝန်ရှိသူက “ရုံးကိုအသွား လမ်းမှာ ရှင်းလင်းခဲ့တာပါ။ သူကစကစထောက်တိုင်။ သမငွေတွေ အတင်းအကျပ် ဆပ်ခိုင်းတယ်။ မီတာခတွေဆောင်ဖို့ စည်းရုံးတာတွေ၊ ခြိမ်းခြောက်တာတွေလုပ်တယ်။ CDM တွေကိုလည်း ခြိမ်းခြောက်တယ်။ သူကအနေအထိုင်ပိရိတယ်။”ဟု ပြောသည်။
အဆိုပါရှင်းလင်းမှုအား PDFတောင်သာအဖွဲ့နှင့် မလှိုင်တော်လှန်ရေး အင်အားစုတို့ပူးပေါင်းကာ ဆောင်ရွက်ခဲ့ခြင်းဖြစ်ပြီး ၎င်းထံမှ ဆိုင်ကယ်တစ်စီး၊ သမရုံးစာရွက်စာတမ်းများနှင့် တံဆိပ်တုံးများ သိမ်းဆည်းရမိခဲ့ကြောင်း PDFတောင်သာက အသိပေးထားသည်။
ရပ်ကျေးအုပ်ချုပ်ရေးမှူး ပစ်ခတ်ခံရပြီးနောက် အကြမ်းဖက်စစ်ကောင်စီတပ်များရောက်ရှိိလာကာ စစ်ဆေးမှုများပြုလုပ်နေကြောင်း ဒေသခံများက ပြောသည်။
