မကွေးတိုင်း၊ မြိုင်မြို့နယ်မြောက်ပိုင်းရှိ ကျောက်ကန်ကျေးရွာတွင် အကြမ်းဖက် စစ်ကောင်စီတပ်က ဒေသခံပြည်သူတစ်ဦးအား သတ်ဖြတ်မီးရှို့ပြီး နေအိမ်အဆောက်အဦး ၁၀၀ကျော်ကိုလည်း မီးရှို့ဖျက်ဆီးသွားကြောင်း ဒေသတွင်းသတင်းရင်းမြစ်များက ပြောသည်။
အကြမ်းဖက်စစ်ကောင်စီတပ်သည် ဇူလိုင် ၂၃ရက်က ကျောက်ကန်ကျေးရွာရှိ လူနေအိမ်နှင့် အဆောက်အဦး စုစုပေါင်း ၁၀၀ကျော် မီးရှို့ဖျက်ဆီးခဲ့ပြီး ကား ၊ ဆိုင်ကယ် ၊ လှည်းစသည့် အဖိုးတန်ပစ္စည်း အများအပြားပါ မီးလောင်ပျက်စီးခဲ့ရကြောင်း နွေဦးတော်လှန်ရေး-မြိုင်က ထုတ်ပြန်သည်။
![(ကျောက်ကန်ကျေးရွာအား အကြမ်းဖက်စစ်တပ်က မီးရှို့ဖျက်ဆီးသွားပြီးနောက် တွေ့ရစဥ်။ဓာတ်ပုံ-နွေဦးတော်လှန်ရေး-မြိုင်)](https://i0.wp.com/www.ludunwayoo.com/wp-content/uploads/2022/07/294662949_431366442386147_3342057537065296080_n.png?resize=720%2C539&ssl=1)
![(ကျောက်ကန်ကျေးရွာအား အကြမ်းဖက်စစ်တပ်က မီးရှို့ဖျက်ဆီးသွားပြီးနောက် တွေ့ရစဥ်။ဓာတ်ပုံ-နွေဦးတော်လှန်ရေး-မြိုင်)](https://i0.wp.com/www.ludunwayoo.com/wp-content/uploads/2022/07/295453130_431366522386139_7580850628608641864_n.png?resize=720%2C539&ssl=1)
ထို့ပြင် ကျောက်ကန်ကျေးရွာမှ အပြစ်မဲ့ပြည်သူတစ်ဦးကိုလည်း အကြမ်းဖက်စစ်အုပ်စုက သတ်ဖြတ်ကာ အလောင်းကို မီးရှို့ဖျက်ဆီးခဲ့ကြောင်း နွေဦးတော်လှန်ရေး-မြိုင်က အသိပေးသည်။
“ရွာအနောက်ဘက်က ဆီဆိုင်ကိုမီးရှို့တယ်။ ပြီးတော့အိမ်တွေကိုလည်း ရှို့သွားတာ။ ဘာလို့ရှို့တာ မှန်းကိုမသိတာ။”ဟု ဒေသခံတစ်ဦးက ပြောသည်။
ကျောက်ကန်ကျေးရွာအပြင် ကျောင်းရပ် ၊ ကျောက်တောင် ၊ သီတင်းပင် ၊ ဘန့်ဘိုးစသည့် ကျေးရွာများကိုလည်း စစ်အုပ်စုက ဝင်ရောက်မွှေနှောက် ဖျက်ဆီးခဲ့သည်။
![(ကျောက်ကန်ကျေးရွာအား အကြမ်းဖက်စစ်တပ်က မီးရှို့ဖျက်ဆီးသွားပြီးနောက် တွေ့ရစဥ်။ဓာတ်ပုံ-နွေဦးတော်လှန်ရေး-မြိုင်)](https://i0.wp.com/www.ludunwayoo.com/wp-content/uploads/2022/07/295239227_431366592386132_4892927578732517576_n.png?resize=720%2C539&ssl=1)
![(ကျောက်ကန်ကျေးရွာအား အကြမ်းဖက်စစ်တပ်က မီးရှို့ဖျက်ဆီးသွားပြီးနောက် တွေ့ရစဥ်။ဓာတ်ပုံ-နွေဦးတော်လှန်ရေး-မြိုင်)](https://i0.wp.com/www.ludunwayoo.com/wp-content/uploads/2022/07/295024182_431366685719456_1480316355958349474_n.png?resize=720%2C539&ssl=1)
စစ်ကောင်စီတပ်၏ ဘေးရန်ကြောင့် ကျေးရွာ၇ ရွာထက်မနည်း ထွက်ပြေး တိမ်းရှောင်နေရကြောင်း ဒေသခံများက ပြောသည်။
ထို့အပြင် သီတင်းပင်ကျေးရွာကိုလည်း လက်နက်ကြီးဖြင့် ပစ်ခတ်ဝင်ရောက်၍ ဒေသခံပြည်သူတစ်ဦး ကျည်ထိမှန်ခဲ့သည်။
![(ကျောက်ကန်ကျေးရွာအား အကြမ်းဖက်စစ်တပ်က မီးရှို့ဖျက်ဆီးသွားပြီးနောက် တွေ့ရစဥ်။ဓာတ်ပုံ-နွေဦးတော်လှန်ရေး-မြိုင်)](https://i0.wp.com/www.ludunwayoo.com/wp-content/uploads/2022/07/295653976_431366655719459_7820657342812519709_n.png?resize=720%2C539&ssl=1)
ဇူလိုင်၂၄ရက်ကလည်း မြိုင်နယ်မြောက်ပိုင်း ဓမ္မသာရရွာသို့ စစ်ကောင်စီတပ်က အင်အား အလုံးအရင်းဖြင့် ဝင်ရောက်မွှေနှောက်ခဲ့ပြီး မီးရှို့ဖျက်ဆီးခဲ့ရာ နေအိမ်၇လုံး ပျက်စီးဆုံးရှုံးခဲ့ကြောင်း၊ ဓမ္မသာရရွာအနောက်ဘက် ဘန့်ဘိုးရွာ တွင်လည်း စစ်ကြောင်းတစ်ခု ဝင်ရောက်မွှေနှောက်ကာ နေအိမ်များကို ဖျက်ဆီးသွားကြောင်း ဒေသခံများက ပြောသည်။
ဇူလိုင်၂၃ရက် နေ့လည် ၂နာရီခွဲခန့်က ကျောက်ကန်ကျေးရွာကို မီးရှို့ဖျက်ဆီးပြီး ထွက်လာသော စစ်ကောင်စီတပ်အား ကျားသစ်နက်ပြောက်ကျားတပ်ဖွဲ့ နှင့်တပ်ပေါင်းစု မဟာမိတ်တပ်များက ခြုံခိုတိုက်ခိုက်ခဲ့ကြသေးသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)