●စစ်ကောင်စီကို အာဆီယံဝန်ကြီးအဆင့်အစည်းအဝေးအားလုံးသို့ တက်ရောက်ခွင့်ပြုမည်မဟုတ်
ဒီမိုကရေစီတက်ကြွလှုပ်ရှားသူလေးဦးကို ကွပ်မျက်ခြင်းသည် လူသားမျိုးနွယ်ကိုဆန့်ကျင်သောရာဇဝတ်မှု(Crime Against Humanity)ဖြစ်ကြောင်း မလေးရှားနိုင်ငံခြားရေးဝန်ကြီးက ပြောကြားလိုက်သည်။
အကြမ်းဖက်စစ်တပ်က ဒီမိုကရေစီအရေးတက်ကြွလှုပ်ရှားသူလေးဦးကို ဥပဒေမဲ့သတ်ဖြတ်လိုက် ခြင်းနှင့်ပတ်သက်၍ ဒေသတွင်းနှင့် ကုလသမဂ္ဂအပါအဝင် အင်အားကြီးနိုင်ငံများက ပြင်းထန်စွာ ရှုတ်ချကြသော်လည်း ကြီးလေးသည့်ရာဇဝတ်မှုဖြစ်ကြောင်း မလေးရှားက ပထမဆုံးထုတ်ဖော် ပြောဆိုခြင်းဖြစ်သည်။
ဦးဂျင်မီ၊ ဦးဖြိုးဇေယျာသော်၊ ဦးလှမျိုးအောင်၊ ဦးအောင်သူရဇော်တို့ကို အာဏာသိမ်းစစ်ကောင်စီက ကွပ်မျက်ခဲ့ခြင်းသည် အာဆီယံဘုံဆုံးဖြတ်ချက် ၅ ရပ်ကို သရော်လှောင်ပြောင်းခြင်းဖြစ် ကြောင်းလည်း မလေးရှားနိုင်ငံခြားရေးဝန်ကြီး Saifuddin Abdullah က ယနေ့ပြောသည်။
ပြီးခဲ့သည့် ဇူလိုင် ၂၂ ရက်ကတည်းက မလေးရှားအစိုးရအဖွဲ့သည် အရေးကြီးသည့်အကြောင်းအရာနှစ်ရပ်ကို ဆုံးဖြတ်ခဲ့ပြီး ယင်းတို့မှာ အာဆီယံ၏ဝန်ကြီးအဆင့်အစည်းအဝေးအားလုံးသို့ မြန်မာနိုင်ငံ၏ နိုင်ငံရေးဆိုင်ရာကိုယ်စားလှယ်ကို တက်ရောက်ခွင့်မပေးရန်နှင့် ဘုံဆုံးဖြတ်ချက် ၅ ရပ် အကောင်အထည်ဖော်ရေး ရှင်းလင်းပြတ်သားသည့် နောက်ဆုံးအဆင့်မူဘောင်လိုအပ်မှုတို့ဖြစ်ကြောင်း ဝန်ကြီးကအသိပေးသည်။
ထို့အပြင် မလေးရှားနိုင်ငံခြားရေးဝန်ကြီးသည် ကုလသမဂ္ဂအတွင်းရေးမှူးချုပ်၏ မြန်မာနိုင်ငံဆိုင်ရာအထူးကိုယ်စားလှယ်နှင့် ယနေ့တွေ့ဆုံခဲ့ပြီး မြန်မာ့အရေးနှင့်ပတ်သက်၍ အကြောင်းအရာ များစွာကို ဆွေးနွေးခဲ့ကြောင်း ထုတ်ပြန်သည်။
မလေးရှားသည် စစ်ကောင်စီက ဒီမိုကရေစီတက်ကြွလှုပ်ရှားသူလေးဦးကို ကွပ်မျက်ခဲ့ခြင်းအား ရှုတ်ချကြောင်း ကုလအထူးကိုယ်စားလှယ် Dr. Noeleen Heyzer နှင့်တွေ့ဆုံစဉ် မလေးရှားနိုင်ငံ ခြားရေးဝန်ကြီးက ထည့်သွင်းပြောကြားသည်။
