စစ်ကောင်စီတပ်မှ သေဆုံးထိခိုက်ရှိဟု ဖော်ပြ
မကွေးတိုင်း မြိုင်မြို့နယ်အတွင်း စစ်ကြောင်းထိုးထားသည့် စစ်ကောင်စီတပ်ကို ယနေ့နံနက်က ပြောက်ကျားနည်းဖြင့် တိုက်ခိုက်ခဲ့ရာ စစ်ကောင်စီတပ်မှ သေဆုံးထိခိုက်ရှိခဲ့ကြောင်း မြိုင်မြို့နယ် ပြည်သူ့ကာကွယ်ရေးအဖွဲ့(ပကဖ)က သတင်းထုတ်ပြန်သည်။
ယနေ့ ဇူလိုင် ၂၇ရက် နံနက် ၉နာရီခန့်တွင် မြိုင်နယ် မြောက်ပိုင်းသို့ စစ်ကြောင်း ထိုးလာသည့် အင်အား ၆၀ ခန့်ရှိ စစ်ကြောင်းကို ပြောက်ကျားတိုက်ခိုက်ခဲ့ပြီး အောင်မြင်စွာ ဆုတ်ခွာနိုင်ခဲ့သည်ဟု ဆိုသည်။
တိုက်ခိုက်မှုအတွင်း စစ်ကောင်စီတပ်မှ သုံးဦးသေဆုံးပြီး အများအပြား ဒဏ်ရာရနိုင်ကြောင်း ဖော်ပြထားပြီး ပြည်သူ့ရဲဘော်များ ထိခိုက်မှုမရှိဟု ထုတ်ပြန်သည်။
မြိုင်မြို့နယ် မကျီးစုရွာနှင့် ကျောက်ဆောင်ရွာအကြားတွင် ယမန်နေ့ (ဇူလိုင် ၂၆ရက်)ကလည်း စစ်ကောင်စီတပ် စစ်ကြောင်းကို ဒေသတွင်း ပြည်သူ့ကာ ကွယ်ရေးတပ်(PDF) ပူးပေါင်းတပ်က တိုက်ခိုက်ခဲ့ရာ စစ်ကောင်စီတပ်မှ သေဆုံးထိခိုက်ရှိသကဲ့သို့ PDF ပူးပေါင်းတပ်မှ ရဲဘော်အချို့ ဒဏ်ရာရခဲ့သည်။
လတ်တလော စစ်ရေးအခြေအနေများကြောင့် ပခုက္ကူ-မြိုင်လမ်းမကြီးအား ယာယီပိတ်ထား ကြောင်း ပခုက္ကူမြို့ပြ ပြောက်ကျားတပ်က ယနေ့တွင် အသိပေးထားသည်။
