ချင်းပြည်နယ်၊ ထန်တလန်မြို့နယ်အတွင်းရှိ ချင်းအမျိုးသားတပ်ဦး(CNF) နှင့် ချင်းဒေသကာကွယ်ရေးတပ်(CDF) ထိမ်းချုပ်နယ်မြေများ၌ ကြားကာလ ပြည်သူ့ပညာရေးဌာန ဦးဆောင်မှုဖြင့် ပထမအကြိမ် ကြားကလစာမေးပွဲကို ကျင်းပခဲ့ရာ ကျောင်းသား၊ကျောင်းသူ ခုနစ်ထောင်ကျော် ဝင်ရောက်ဖြေဆိုခဲ့သည်ဟု The Chin Journal က ဖော်ပြသည်။
အဆိုပါ စာမေးပွဲကို ဇူလိုင် ၂၅ရက်မှ ၂၇ရက်အထိ ကျင်းပခဲ့သည်ဟုဆိုသည်။
“ထန်တလန်မြို့နယ် တောင်ကြော ၅ခုမှာ ကြားကလစာမေးပွဲကို တစ်ပြိုင် တည်း ကျနော်တို့ပြု လုပ်ပါတယ်။ ဖြေဆိုသူကျောင်းသားကျောင်းသူ ၇၀၀၀ ကျော်ရှိကြပါတယ်။ အဲဒီ ၇,၀၀၀ ကျော်ထဲမှာ စစ်ဘေးရှောင်ကလေးတွေက ၃,၀၀၀ ခန့် ရှိကြတယ်” လို့ ထန်တလန်မြို့နယ် ကြားကာလပညာရေးဌာမှ ပညာရေးမှူး Salai Cross Thang ကပြောကြားကြောင်း The Chin Journalက ဖော်ပြထားပါတယ်။
စစ်ကောင်စီအာဏာသိမ်းမှုကြောင့် အတန်းပြီးမြောက်အောင် မသင်ကြား နိုင်သော ကျောင်းသား၊ကျောင်းသူများကို ၆လတာကာလ သင်ကြားရေးစနစ်ဖြင့် ပညာသင်ကြားပေးခဲ့ရာ ယခု ဇူလိုင်တွင် အတန်းတင်စာမေးပွဲ ပြုလုပ်ခြင်း ဖြစ်သည်။
လာမည့် စက်တင်ဘာတွင် ပညာသင်နှစ်အသစ် ပြန်လည်စတင်ရန် စီစဉ်ထားရာ ကျောင်းသုံးစာအုပ် ပြည့်စုံစွာ ရရှိရေး၌ အခက်အခဲရှိနေသည်ဟု ဆိုသည်။
ပညာသင်ကြားပေနေသော ဆရာဆရာမများသည် CDM ကျောင်းဆရာ၊ဆရာမများနှင့် volunteer လူငယ်များဖြစ်ကြကြောင်း ဖော်ပြထားသည်။
ထန်တလန်မြို့နယ် ကြားကာလပညာရေးဌာအနေဖြင့် အဆိုပါ ဆရာ၊ဆရာမများအတွက် ထောက်ပံ့ကူညီပေးနိုင်ခြင်းမရှိသော်လည်း ကျေးရွာအလိုက် ပြည်သူများက တက်နိုင်သည့်ဘက်က ကူညီပေးကြောင်း၊ NUG ပညာရေးဌာနကလည်း ကျောင်းသား ဦးရေ ၅၀ တွင် ၁၅၀၀၀၀ ကျပ်နှုန်းဖြင့် ထောက်ပံ့ကူညီမှုပေးခဲ့ကြောင်း ထန်တလန်မြို့နယ် ကြားကာလပညာရေးဌာမှ ပညာရေးမှူးက ပြောကြားခဲ့သည်ဟု ဆိုသည်။
