ဝေါ်လေဒေသအနီး ဥကရစ်ထနယ်မြေထဲမှာ စစ်ကောင်စီတပ်နဲ့ ခြင်္သေ့စစ်ကြောင်းအပါအဝင် ပူးပေါင်းစစ်ကြောင်းတွေအကြား လေးရက်အတွင်း တိုက်ပွဲတွေမှာ စစ်ကောင်စီဘက်က သေဆုံးနဲ့ဒဏ်ရာရရှိသူဦးရေတစ်ရာခန့်ရှိနိုင်တယ်လို့ ခြင်္သေ့စစ်ကြောင်းက ထုတ်ပြန်ထားပါတယ်။
ခြင်္သေ့စစ်ကြောင်းစိုးမိုးနယ်မြေအတွင်း နယ်မြေကျူးကျော်လာတဲ့ စစ်ကောင်စီတပ်နဲ့ ဇူလိုင်(၃၀)ရက် ညနေ(၄)နာရီက ဥကရစ်ထနယ်မြေအနီးမှာ တိုက်ပွဲဖြစ်ပွားခဲ့ပြီး အဲ့ဒီတိုက်ပွဲဟာ ဩဂုတ်(၂)ရက်အထိ ကြာမြင့်ခဲ့ကာ အဆိုပါတိုက်ပွဲမှာ ခြင်္သေ့စစ်ကြောင်းနဲ့အတူ အခြားပူးပေါင်းစစ်ကြောင်းတွေလည်း ပါဝင်ခဲ့တယ်လို့ ထုတ်ပြန်ချက်မှာဖော်ပြထားပါတယ်။
အဲ့ဒီလေးရက်တာအတွင်းဖြစ်ပွားခဲ့တဲ့တိုက်ပွဲမှာ ထိုးစစ်ဆင်လာတဲ့စစ်ကောင်စီဘက်က သေဆုံးနဲ့ဒဏ်ရာရသူဟာ (၁၀၀)ဝန်းကျင်အထိရှိနိုင်ကြောင်း ကနဦးမှန်းဆချက်တွေအရသိရပြီး ခြင်္သေ့စစ်ကြောင်းကွန်မန်ဒိုအဖွဲ့ဘက်ကတော့ အသက်(၂၁)နှစ်အရွယ် တက္ကသိုလ်ကျောင်းသားတစ်ဦးဖြစ်တဲ့ ကျော်သီဟဟာ နွေဦးတော်လှန်ရေးအတွက် မြင့်မြတ်စွာအသက်စွန့်လှူခဲ့ရတယ်လို့ ထုတ်ပြန်ချက်မှာပါရှိပါတယ်။
ခြင်္သေ့စစ်ကြောင်းဟာ ပြီးခဲ့တဲ့ ဇွန်လ(၂၆)ရက်က စစ်ကောင်စီရဲ့ ဥကရစ်ထစခန်းကို မဟာမိတ်တပ်ဖွဲ့တွေနဲ့အတူ စတင်တိုက်ခိုက်ခဲ့တဲ့ စစ်ကြောင်းတစ်ခုဖြစ်ပြီး ဥကရစစ်ထစခန်းတိုက်ပွဲအတွင်း ခြင်္သေ့စစ်ကြောင်းဘက်က ရဲဘော်နှစ်ဦးဟာ နွေဦးတော်လှန်ရေးအတွက် မြင့်မြတ်စွာအသက်ပေးလှူခဲ့ရတယ်လို့ ခြင်္သေ့စစ်ကြောင်းရဲ့ ထုတ်ပြန်ချက်အရ သိရပါတယ်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)