နိုင်ငံတကာရာဇ၀တ်ခုံရုံး(ICC)သည် မြန်မာစစ်တပ်၏ အပြစ်ပေးခြင်းမှကင်းလွတ်ခွင့်ရနေမှု(impunity)ကို အရေးပေါ် အဆုံးသတ်နိုင်ကာ အဆုံးသတ်ရမည်ဟု မြန်မာ့အရေးအထူးအကြံပေးကောင်စီ(SAC-M)က တိုက်တွန်းသည်၊
၂၀၂၂ တစ်နှစ်ပတ်လုံး ဆက်လက်ကျယ်ပြန့်လာနေသည့် မြန်မာနိုင်ငံရှိ လူ့အခွင့်အရေးရက်စက်ကြမ်းကြုတ်မှုများမှာ စစ်တပ်ကို တာ၀န်ခံခိုင်းခြင်းမရှိမချင်း ဆက်လက်ဖြစ်ပွားနေမည်ဖြစ်ကြောင်း ကုလသမဂ္ဂအရာရှိဟောင်းများဖြင့် ဖွဲ့စည်းထားသော SAC-M ၏ ယနေ့ထုတ်ပြန်သည့် စာတမ်းအသစ်၌ ဖော်ပြသည်။
“မင်းအောင်လှိုင်နဲ့ သူ့ရဲ့စစ်ဗိုလ်ချုပ်တွေက သူတို့ကို မရပ်တန့်မချင်း မြန်မာပြည်သူတွေအပေါ် ရက်စက်ယုတ်မာမှုတွေကျူးလွန်ပြီး ဒုက္ခဆက်ပေးနေဦးမှာပါ။ ICC မှာ သူတို့ကို အပြစ်ပေးအရေးယူဖို့အတွက် နိုင်ငံတကာအသိုင်းအဝန်းက ဖြစ်နိုင်သမျှအရာအားလုံး လုပ်ဆောင်ရပါမယ်” ဟု SAC-M မှ Yanghee Lee က ပြောသည်။
SAC-M ၏ ‘မြန်မာနိုင်ငံနှင့် နိုင်ငံတကာရာဇ၀တ်ခုံရုံး’ အမည်ရှိ စာတမ်းအသစ်၌ ၂၀၀၂ ခုနှစ်မှစတင်ကာ မြန်မာနိုင်ငံတွင်ကျူးလွန်ခဲ့သော ရက်စက်ကြမ်းကြုတ်သောရာဇ၀တ်မှုများ အပေါ် ICC တရားရုံး၏ စီရင်ပိုင်ခွင့်အတွက် ဥပဒေကြောင်းဆိုင်ရာ အကြောင်းခြင်းရာများကို ရှင်းပြထားသည်။ ယင်းကဲ့သို့ ရာဇ၀တ်မှုများအတွက် မြန်မာစစ်ဗိုလ်ချုပ်များအား နှောင့်နှေးကြန့်ကြာမှုမရှိဘဲ တရားစွဲဆိုနိုင်ရေးအတွက် နိုင်ငံတကာအသိုက်အဝန်း၌ တာ၀န်ရှိကြောင်းလည်း စာတမ်းတွင် ထည့်သွင်းရေးသားသည်။
“ရခိုင်၊ ကချင်နဲ့ ရှမ်းပြည်နယ်တွေမှာ မြန်မာစစ်တပ်ရဲ့ကျူးလွန်ချိုးဖောက်မှုတွေကို ဖော်ထုတ်ဆန်းစစ်ထားတဲ့ ကုလသမဂ္ဂအချက်အလက်ရှာဖွေရေးမစ်ရှင် ပြီးဆုံးချိန် ၂၀၁၈ ကတည်းက မင်းအောင်လှိုင်နဲ့ သူ့ရဲ့စစ်ဗိုလ်ချုပ်တွေကို လူမျိုးတုံးသတ်ဖြတ်မှု၊ လူသားမျိုးနွယ်အပေါ် ကျူးလွန်တဲ့ရာဇ၀တ်မှုများ၊ စစ်ရာဇ၀တ်မှုများအတွက် တရားစွဲဆိုဖို့အတွက်် ကျွန်တော်တို့ တောင်းဆိုခဲ့ပြီးဖြစ်ပါတယ်” ဟု SAC-M မှ Chris Sidoti က ပြောသည်။
