မကွေးတိုင်း ထီးလင်းမြို့နယ် ညောင်ဟောင်းကျေးရွာအနီးတိုက်ပွဲတွင် စစ်ကောင်စီတပ် စစ်ကြောင်းမှူး အပါအဝင်သုံးဦးသေဆုံးကြောင်း ယောတော်လှန်ရေးတပ်(YRA)က ပြောသည်။
ထီးလင်းမြို့အထိုင်တပ်နှင့် ရွှေအောင်သာအထိုင်တပ်ရောထွေးတပ်တို့က စစ်ကောင်စီစစ်ကြောင်းကို ယမန်နေ့(ဒီဇင်ဘာ ၁၄ ရက်) နေ့လယ် ၂နာရီ ၁၀မိနစ်ခန့်က ညောင်ဟောင်းကျေးရွာအနီးရောက်လာစဥ် YRA(ထီးလင်း)က ကြားဖြတ်တိုက်ခိုက်ခဲ့သည်ဟု ဆိုသည်။
“မနေ့ကတည်းက ထမ်းစင်တွေနဲ့ ဆုတ်သွားတာကိုပဲ အတည်ပြုနိုင်ခဲ့သေးတာပေါ့။ဒီနေ့ ထပ်ပြီး ယုံကြည်ရတဲ့သတင်းရင်းမြစ်ကနေ စုံစမ်းတော့ စကစစစ်ကြောင်းမှူးနဲ့ နောက်နှစ်ဦး သေပြီ ဆိုတာအတည်ပြုနိုင်တယ်။ဒါကြောင့်လည်း စကစစစ်ကြောင်းက ထီးလင်းမြို့ ပေါ်ကို ဆုတ်တဲ့လမ်းကြောင်းပေါ်ရောက်နေပြီ”ဟု YRA တာဝန်ရှိသူက လူထုနွေဦးသို့ ပြောသည်။
မြေပြင် စုံစမ်းအတည်ပြုနိုင်ခဲ့သည်ဆိုသော သေဆုံးသွားသည့် စစ်ကောင်စီစစ်ကြောင်းမှူးမှာ စစ်ကိုင်းတိုင်း မုံရွာအခြေစိုက် အနောက်မြောက်တိုင်းစစ်ဌာနချုပ်မှ ယခုလပိုင်းအတွင်း အသစ် ပြောင်းရွှေ့လာသူဟု ၎င်းက အသိပေးသည်။
ထို့အပြင် စစ်ကောင်စီတပ်၏ သေဆုံးအလောင်းများကို ၎င်းတို့စစ်ကြောင်းနှင့် တပါတည်းသယ်ဆောင်ခြင်း ရှိ၊မရှိ YRAက ဆက်လက်စုံ စမ်းနေဆဲဟု ဆိုသည်။
“စခ စစ်ကြောင်းမှူးက အောင်းမြောက်ရွာဘုန်း ကြီးကျောင်းမှာဆေးကုသမှုခံယူရင်း သေဆုံးသွားတာလို့ သိရတယ်”ဟု ယောဒေသစစ်ရေး သတင်းရင်းမြစ်က အတည်ပြုသည်။ သို့သော် ၎င်းတို့ သေဆုံးမှုနှင့်ပတ်သက်ပြီး လူထုနွေဦးက သီးခြားအတည်မပြုနိုင်သေးပေ။
လက်ရှိ ထီးလင်းမြို့ပေါ်သို့ ပြန်လည်ဆုတ်ခွာနေသည့် စစ်ကောင်စီစစ်ကြောင်းသည် သရခါကျေးရွာသို့ ရောက်ရှိနေကြောင်းလည်း သိရသည်။
