တနင်္သာရီတိုင်း ထားဝယ်ခရိုင်၊ လောင်းလုံးမြို့နယ်ရှိ သကျက်တောရဲစခန်းမှ စစ်ကောင်စီတပ်သားများ စခန်းအား ဖျက်ဆီးပြီး စွန့်ခွာသွားကြောင်း ဒေသခံသတင်းရင်းမြစ်များက ပြောသည်။
စခန်းရှိ စစ်ကောင်စီတပ်သား ၂၀ နှင့် တပ်ကူအင်အား အပါအဝင်စုစုပေါင်း စစ်ကောင်စီတပ်ဖွဲ့ဝင် ၄၀ခန့်မှာ ယမန်နေ့(ဇန်နဝါရီ ၁၃ ရက်)ညပိုင်းက ရေလမ်းကြောင်းမျ တဆင့်ထွက်ခွာခဲ့သည်ဟု ဆိုသည်။
“ဒီကောင်တွေက ဉာဏ်နီဉာဏ်နက် အရမ်းများတယ်။ကျွန်တော်တို့ သတိထားပြီးတော့ စောက်ကြည့်နေရတုန်း ခင်ဗျား။ စခန်းမစွန့်ခင် မနေ့ကညပိုင်းမှာ ရေလမ်းကနေ ၃၀ကျော် ရောက်လာပြီး သူတို့တွေနဲ့အတူတူ ဆုတ်သွားတယ် ခင်ဗျ”ဟု LLPDF မှ တော်လှန်ရေးရဲဘော်တစ်ဦးက ပြောသည်။
“စကစ တပ်ကူတွေက မော်တော်နှစ်စီးနဲ့ ၈ရက်နေ့က သကျက်တောရွာ ရဘဲတောင်ဘုန်းကြီး ကျောင်းကိုရောက်လာတာ။ပထမတော့ စစ်ကြောင်းထိုးမယ်ထင်တာ။အခုဒီမနက်ကျတော့ စခန်းထဲ ဘယ်သူမှမရှိကြတော့ဘူး”ဟု သကျက်တော ဒေသခံတစ်ဦးက ပြောသည်။
ရဲစခန်းဝင်ပေါက်နှင့် ဆိုင်းပုဒ်များကိုပါ ဆေးဖြူ များသုပ်သွားသည့်အပြင် ကင်းတဲ၊ ဘန်ကာများဖျက်ဆီးထားခဲ့ကြောင်းလည်း သိရသည်။
ဇန်နဝါရီ ၆ ရက်က သကျက်တောရဲစခန်းမှ စစ်ကောင်စီတပ်သား နှစ်ဦးထန်းရည်သောက်ပြီးပြန်လာချိန်တွင် တိုက်ခိုက်ခဲ့ရာ တစ်ဦးသေဆုံးပြီး တစ်ဦးဒဏ်ရာရခဲ့ကြောင်းလည်း လောင်းလုံး PDF က ထုတ်ပြန်ထားသည်။
ထို့အပြင် သကျက်တောရဲစခန်းကို ယမန်နှစ်က ပြည်သူ့ကာကွယ်ရေးတပ်များပူးပေါင်းပြီး ဝင်ရောက်တိုက်ခိုက်မှုရှိခဲ့သည်။
