စစ်ကိုင်းတိုင်း၊ ပုလဲမြို့နယ်တွင် ပြည်သူ့ရင်ခွင်ခိုလှုံပြီး CDMပြုလုပ်လာသည့် စစ်ကောင်စီတပ် သားတစ်ဦးအား အုပ်ချုပ်ရေးနှင့်ကာကွယ်ရအဖွဲ့များ၊ ပြည်သူများပူးပေါင်းကာ ကျပ်သိန်း ၈၀ ချီးမြှင့်ခဲ့ကြောင်း ပုလဲမြို့နယ်ပြည်သူ့အုပ်ချုပ်ရေးအဖွဲ့က သတင်းထုတ်ပြန်သည်။
ပြည်သူ့ရင်ခွင်ခိုလှုံလာသည့် CDM တပ်သား ကိုကျော်ငြိမ်းလင်းအား ပုလဲမြို့နယ်ပြည်သူ့ အုပ်ချုပ်ရေးအဖွဲ့ (ပအဖ) ၊ ပုလဲမြို့နယ်ပြည်သူ့ကာကွယ်ရေးအဖွဲ့ (ပကဖ)တို့က ဂုဏ်ပြုချီးမြှင့်ငွေ သိန်း ၅၀ကျပ်နှင့် ပုလဲမြို့နယ်ပြည်သူများက ဂုဏ်ပြုချီးမြှင့်ငွေ သိန်း ၃၀ကျပ်၊ စုစုပေါင်းငွေသား သိန်း၈၀ကျပ်ကို CDM တပ်သား ကျော်ငြိမ်းလင်းအား ပေးအပ်ချီးမြှင့်ခဲ့ကြောင်း ပုလဲမြို့နယ်ပြည်သူ့အုပ်ချုပ်ရေးအဖွဲ့ သတင်းနှင့်ပြန်ကြားရေး တာဝန်ခံက ပြောသည်။
CDM တပ်သား ကိုကျော်ငြိမ်းလင်းနှင့်အတူMA 11 ဂန်းတလက် ၊ ကျည်ဘောက် ၃ခု ၊ 5.56 ကျည်(၇၄)တောင့် ၊ဗုံးသီး တစ်လုံးနှင့် ကျည်ကာ တစ်ထည် ပါရှိခဲ့ကြောင်း အထက်ပါ တာဝန်ခံက ပြောသည်။
“ဇန်နဝါရီ ၄ ရက်နေ့မှာ CDM စဝင်တယ်။ ကနီမှာ တာဝန်ထမ်းရင်း ပုလဲတော်လှန်ရေးအင်အားစုတွေနဲ့ ချိတ်ဆက်ပြီး ပုလဲ ပအဖ ထံ အလင်းဝင်တာပါ။”ဟု ပုလဲမြို့နယ်ပြည်သူ့အုပ်ချုပ်ရေးအဖွဲ့ သတင်းနှင့်ပြန်ကြားရေး တာဝန်ခံက ပြောသည်။
အမှားအမှန်ကို ခွဲခြားသိပြီး ပြည်သူများနှင့်အတူ နွေဦးတော်လှန်ရေးတွင် ရဲရင့်ပြတ်သားစွာ ပူးပေါင်းပါဝင်ခဲ့သည့် CDM တပ်သား ကိုကျော်ငြိမ်းလင်းအား အထူးပင်ကျေးဇူးတင် ဂုဏ်ယူမိကြောင်း ပုလဲပအဖက အသိပေးသည်။
စစ်ကောင်စီလက်အောက်တွင် တာဝန်ထမ်းဆောင်နေကြသည့် စစ်သားများနှင့် ရဲတပ်သားများလည်း နွေဦးတော်လှန်ရေး ပြည်သူများနှင့်အတူ ရဲရင့်ပြတ်သားစွာ ပူးပေါင်းပါဝင်ပေးကြပါရန် ပုလဲပအဖက မေတ္တာရပ်ခံထားသည်။
