စစ်ကောင်စီတပ်လာသည်သတင်းကြား၍ နယ်ခံအမျိုးသားတစ်ဦး ကြိုးဆွဲချအဆုံးစီရင်
စစ်ကိုင်းတိုင်း၊ ကျွန်းလှမြို့နယ်တွင် စစ်ကောင်စီစစ်ကြောင်းက အင်းမကျေးရွာအား နှစ်ရက်ဆက် မီးရှို့ဖျက်ဆီးခဲ့ပြီး စစ်ကြောင်းထိုးလာသည်သတင်းကြား၍ ဒေသခံအမျိုးသားတစ်ဦး ကြိုးဆွဲချကာ အဆုံးစီရင်သွားကြောင်း နယ်ခံသတင်းရင်းမြစ်များက ပြောသည်။
ဇန်နဝါရီ ၉ရက် နံနက်ပိုင်းက ကျွန်းလှမြို့နယ်၊ ကြာတကန်နှင့် ထန်းပင်ကုန်းကျေးရွာမှ စစ်ကောင်စီစစ်ကြောင်းသည် ပင့်သာတိုက်နယ်သို့ ဦးတည်လာသည်ဟု သတင်းကြား၍ ပင့်သာကျေးရွာနေ အသက်(၄၈)နှစ်အရွယ် အမျိုးသားတစ်ဦး မိမိကိုယ်ကိုယ် ကြိုးဆွဲချ အဆုံးစီရင်သွားကြောင်း ကျွန်းလှ – ကန့်ဘလူ တက်ကြွလှုပ်ရှားသူများအဖွဲ့ -ကန့်ဘလူခရိုင်၏ အဖွဲ့ဝင်တစ်ဦးက ပြောသည်။
အဆိုပါအမျိုးသားသည် ယခင်က စစ်ကောင်စီ၏ လူသားဒိုင်းအဖြစ် ဖမ်းဆီးခေါ်ဆောင်ခြင်းခံခဲ့ရရာမှ ထွက်ပြေးလွတ်မြောက်လာခဲ့သူဖြစ်ပြီး နှိပ်စက်ခံရသည့် ဒဏ်ရာများကြောင့် ကျန်းမာရေးချို့တဲ့နေသူဖြစ်ကြောင်း ကျွန်းလှ – ကန့်ဘလူ တက်ကြွလှုပ်ရှားသူများအဖွဲ့၏ အဖွဲ့ဝင်တစ်ဦးက ပြောသည်။
“ဒီစစ်ကြောင်းက အတော်ဆိုးတယ်ဗျ။ပိတ်မိသမျှ ပြည်သူတွေ အကုန်သတ်တာ။ သတ်သေသွားတဲ့သူကလည်း ဘယ်လောက်နှိပ်စက်ခံထားရလဲဆိုတာ သူပဲသိမှာကိုး။”ဟု အထက်ပါအဖွဲ့ဝင်က ပြောသည်။
အဆိုပါ စစ်ကြောင်းသည် စစ်ကောင်စီ ခြေမြန်တပ်ရင်း ခမရ(၃၆၈) နှင့် ပျူစောထီး စုစုပေါင်းအင်အား ၁၅၀ခန့်ပါဝင်ပြီး ကန့်ဘလူမြို့နယ်အတွင်း စစ်ကြောင်းထိုး ဖျက်ဆီးမှုများ ပြုလုပ်နေရာ ယမန်နေ့ (ဇန်နဝါရီ ၂၁ ရက်) နံနက် ၁၁နာရီခန့်က ပင့်သာတိုက်နယ်၊ အင်းမရွာအား ဝင်ရောက်စီးနင်းပြီး မီးရှို့ဖျက်ဆီးခဲ့ကြောင်း ကျွန်းလှ – ကန့်ဘလူ တက်ကြွလှုပ်ရှားသူများအဖွဲ့၏ အဖွဲ့ဝင်တစ်ဦးက ပြောသည်။
ထို့နောက် ကျေးရွာအတွင်း နှစ်ရက်ဆက်တိုက်တပ်စွဲထားကာ ယနေ့ (ဇန်နဝါရီလ ၂၂ ရက်)နံနက် ၇ နာရီ ၄၀ မိနစ်တွင် ထပ်မံ မီးရှို့ဖျက်ဆီးခဲ့ပြီး ပျက်စီးဆုံးရှုံးမှုမသိရသေးကြောင်း နယ်ခံများက ပြောသည်။
ယင်းစစ်ကြောင်းသည် ယနေ့နံနက် ၁၀နာရီခန့်တွင် အင်းမရွာမှ ပေကုန်း (တောင်)ရွာသို့ ဦးတည်ထွက်ခွာသွားကြောင်း သိရသည်။
ကန့်ဘလူမြို့နယ်အတွင်း၌ စစ်ကောင်စီတပ်နှင့် ပျူများသည် မီးရှို့ဖျက်ဆီးမှုမလုပ်မီ ပြည်သူ့နေအိမ်များမှ တန်ဖိုးကြီးပစ္စည်းများအား သိမ်းယူသွားလေ့ရှိကြောင်း၊ ထို့အပြင် ကျေးရွာများအတွင်း ပိတ်မိနေသည့် ဒေသခံများကိုပါ သတ်ဖြတ်မှုများ ပြုလုပ်နေကြောင်း ဒေသခံများကပြောသည်။
