မြန်မာနိုင်ငံဟာ တရုတ်နိုင်ငံနဲ့ တရုတ်လူမျိုးတွေအတွက် ယုံကြည်စိတ်ချရတဲ့ အိမ်နီးချင်းနိုင်ငံဖြစ်တယ်လို့ အာဏာသိမ်းထားတဲ့ စစ်ကောင်စီခေါင်းဆောင်က ပြောလိုက်ပါတယ်။
ရန်ကုန်မှာမနေ့က တရုတ်သံရုံးက ပြုလုပ်တဲ့ တရုတ်နှစ်ကူးပွဲ ကိုတက်ရောက်ခဲ့တဲ့ စစ်ကောင်စီ ခေါင်းဆောင်က တရုတ်နိုင်ငံကိုအသိပေးလိုက်တာလည်းဖြစ်ပါတယ်။
” မြန်မာနိုင်ငံဟာ တရုတ်ပြည်သူ့သမ္မတနိုင်ငံနဲ့ တရုတ်လူမျိုးများ၊တရုတ်နွယ်ဖွားမြန်မာနိုင်ငံသားများအတွက်မျက်နှာနှစ်ဖက်ဆက်ဆံရေးမျိုးမရှိတဲ့ ယုံကြည်စိတ်ချရတဲ့အိမ်နီးချင်းနိုင်ငံတစ်ခုဖြစ်ပါတယ်” လို့ စစ်ကောင်စီခေါင်းဆောင်က ဆိုပါတယ်။
အရင်က တရုတ်နှစ်ကူးပွဲကို စစ်တပ်ခေါင်းဆောင် တက်ရောက်လေ့မရှိပေမယ့် အာဏာသိမ်းပြီးနောက် ပိုင်း ပထမဆုံးအကြိမ် တက်ရောက်တာလည်းဖြစ်ပါတယ်။
ယခင် စစ်အစိုးရနဲ့ တရုတ်နိုင်ငံဟာ ဆက်ဆံရေးကောင်းမွန်ခဲ့ပေမယ့် လက်ရှိစစ်ကောင်စီနဲ့တော့ ဆက်ဆံရေးဟာအေးစက်နေတယ်လို့ စစ်အစိုးရ နိုင်ငံခြားရေးဒုဝန်ကြီးဟောင်း ကြံခိုင်ရေး ဗဟိုအလုပ်အမှုဆောင် မင်းကင်းဦးမောင်မြင့်က ထုတ်ပြောထားပါတယ်။
တရုတ်ဦးဆောင်ဖွဲ့စည်းထားတဲ့ လန်ချန်း − မဲခေါင်နိုင်ငံများထိပ်သီးအစည်းအဝေးကို ပြီးခဲ့တဲ့ နှစ်ကုန်ပိုင်း အတွင်း မြန်မာနိုင်ငံမှာ စစ်ကောင်စီက ကျင်းပဖို့ စီစဉ်ထားခဲ့ပေမယ့် တရုတ်ကလျစ်လျုရှုထားလို့ စစ်ကောင်စီရဲ့အစီအစဉ်ပျက်ခဲ့ရကြောင်း အယ်ဂျာဇီးယား သတင်းဌာနက ရေးသားခဲ့ဖူးပါတယ်။
