စစ်ကောင်စီ၏ ထိုးစစ်ကြောင့် ဘောလခဲ – ဖားဆောင်နှင့် ဘောလခဲ – ရွာသစ်လမ်းမကြီးများကို ရက်အကန့်အသတ်မရှိပိတ်ထားမည်ဖြစ်ကြောင်း Bawlakhe PDFက ယနေ့ ထုတ်ပြန် သည်။
စစ်ရေးတင်းမာလျက်ရှိချိန်တွင် ပြည်သူများ၏ အသက်ဘေးအန္တရာယ် ထိခိုက်စေမှုများကို ကာကွယ်ရန် လမ်းပိုင်းပိတ်ပင်ခြင်းဟု အသိပေးသည်။
“ ပြည်သူများအနေနှင် ဤထုတ်ပြန်ချက်အား အတိအကျလိုက်နာစေလိုပါတယ်။အခြေနေငြိမ်သက်သွားတဲ့ချိန်ကျ လမ်းပြန်အသုံးပြုရမယ့်နေ့ကို ကျွန်တော်တို့ ပြန်ထုတ်ပြန်ပေးပါမယ်” ဟု Bawlakhe PDF က ပြောသည်။
မတ်လ ၁၆ ရက်က ဘောလခဲမြို့နယ်အထွက် ဖားဆောင်မြို့နယ်ကြား ရေနီပေါက်တံတားအနီတွင် စစ်ကောင်စီစစ်ကြောင်းတိုက်ခိုက်ခံရပြီး သုံးဦးသေဆုံးကာ ၁၀ထက်မနည်းဒဏ်ရာရရှိထားသည်။
ထို့နောက်အထိနာခဲ့သော အကြမ်းဖက်စစ်ကောင်စီတပ်က တိုက်ပွဲဖြစ်ပွားရာအနီးရှိ ရေနီပေါက်ရွာသား ခုနစ်ဦးကို ဓားစာခံအဖြစ် ဖမ်းဆီးသွားပြီး လက်ရှိအချိန်အထိ ပြန်လွှတ်မပေးသေးပေ။
ယခုလ ဆန်းပိုင်းကစ၍ ကရင်နီဒေသအနှံ့ ထိုးစစ်ဆင် နေသော စစ်ကောင်စီတပ်မှာ အထိနာ နေပြီး ဒီးမော့ဆို ၊ ဖယ်ခုံ ၊မိုးဗြဲ နှင့် ပင်လောင်းမြို့နယ်တိုက်ပွဲများ၌ စစ်ကောင်စီတပ်မှ သေဆုံးသူ ၁၀၀ခန့်ရှိပြီး ခြောက်ဦးအရှင်ဖမ်းမိထားသည်။
