ပဲခူးတိုင်းနဲ့ ကရင်ပြည်နယ်အစပ်မှာရှိတဲ့ လိပ်သို ဒေသမှာ မနေ့က မနက်ပိုင်း စစ်ကောင်စီတပ်နဲ့ တော်လှန်ရေးအင်အားစုတွေကြားတိုက်ပွဲဖြစ်ပွားခဲ့တယ်လို့သိရပါတယ်။
လိပ်သိုဒေသဟာ ကရင်အမျိုးသားအစည်းအရုံးလက်အောက်ခံ ကရင်အမျိုးသားလွတ်မြောက်ရေးတပ်မတော်(KNLA) ရဲ့ တပ်မဟာ ၂ နယ်မြေထဲပါပါတယ်။
မနေ့က စစ်ကောင်စီနဲ့ဖြစ်ပွားတဲ့ တိုက်ပွဲမှာ KNLA နဲ့အတူ PDF တပ်ဖွဲ့တွေပူးပေါင်းတိုက်ခိုက်ကြတယ်လို့ မြေပြင်သတင်းရင်းမြစ်တွေဆီကသိရပါတယ်။
လိပ်သိုမြို့ ၊ဗဟုန်းရွာမှာရှိတဲ့ စစ်ကောင်စီတပ်စခန်းကိုတိုက်ခိုက်တာဖြစ်ပြီး စခန်းမကျအောင် စစ်ကောင်စီဘက်ကလည်း လေကြောင်းသုံးခဲ့ပါတယ်။
ဒါအပြင် လိပ်သိုကနေ တောင်ငူကိုဆက်သွယ်ထားတဲ့ လမ်းကြောင်း ပေါ်က ထုံးဘိုကြီးရွာ တဝိုက်မှာမနေ့က မနက်ပိုင်းမှာတင်တိုက်ပွဲတွေဖြစ်ခဲ့ပါသေးတယ်။
ဒေသတွင်းစစ်ရေးရှုပ်ထွေးနေတဲ့အတွက် ကရင်ပြည်နယ် လိပ်သိုကနေ ပဲခူးတိုင်း တောင်ငူဘက်ကို သွားလာတာတွေမလုပ်ကြဖို့လည်း လိပ်သိုဒေသခံတွေကပြောပါတယ်။
တိုက်ပွဲကြောင့် နှစ်ဖက်ထိခိုက်မှုအခြေအနေကို မသိရသေးဘဲ ဒေသခံရွာသားတွေ ထွက်ပြေးတိမ်းရှောင်နေရပါတယ်။
