ရန်ကုန်မြို့၊ တာမွေမြို့နယ်တွင် ယာဥ်စစ်ဆေးရေးလုပ်နေသည့် စစ်ကောင်စီတပ်သားနှင့် ယာဉ်ထိန်းရဲများ ဗုံးပစ်တိုက်ခိုက်ခံရကြောင်း ဒေသခံများက ပြောသည်။
ယနေ့(မတ်လ ၂၈ ရက်)နံနက် ၁၀နာရီခွဲခန့်က အရှေ့မြင်းပြိုင်ကွင်းလမ်း၌ ဖြစ်ပွားခဲ့သည့် တိုက်ခိုက်မှုတွင် စစ်ကောင်စီဘက်က ထိခိုက်သူ နှစ်ဦးရှိကြောင်း မျက်မြင်တွေ့ရှိသူများက ဆိုသည်။
“ ယာဥ်ထိန်းလေးဦး နဲ့ စစ်သားတစ်ဦးပါတယ်။ ခုံးတံတားပေါ်ကနေ လက်ပစ်ဗုံးနဲ့ ဆော်သွားတာ။ယာဥ်ထိန်း နှစ်ယောက်သွေးတွေနဲ့အရေးပေါ်ကားနဲ့ လာခေါ်သွားရတယ်” ဟု အခင်းဖြစ်စဥ် အနီးနေထိုင်သူက ရှင်းပြ သည်။
ယခုနောက်ပိုင်း ရန်ကုန်မြို့၏ နေရာအများစုတွင် စစ်ကောင်စီ၏ ယာဥ်ထိန်းတပ်ဖွဲ့ဝင်များမှာ ငွေကြေး အဓမ္မတောင်းခံလေ့ရှိသည့်အတွက် ယခု တိုက်ခိုက်မှုကို ကြိုဆိုကြောင်းလည်း ရန်ကုန်မြို့ခံတစ်ဦးက ဆိုသည်။
“ မီးဝါ ဖြတ်မိလို့ ရုံးမှာဒဏ်မသွားဆောင်ချင်ရင် သူတို့က အနည်းဆုံးနှစ်သောင်းတောင်းတယ်။ဒီကောင်တွေက စခ တွေနဲ့ပေါင်းပြီး လူမိုက်ဆန်ဆန်တောင်းနေတာ ပိုအတင့်ရဲလာတယ်” ဟု ၎င်းက ပြောသည်။
ယခုတိုက်ခိုက်မှုကို မည်သည့်အဖွဲ့က ဆောင်ရွက်ခဲ့သာ်ကို လူထုနွေဦးအနေဖြင့် စုံစမ်းဆဲဖြစ်သည်။
