စစ်ကိုင်းတိုင်း တမူးမြို့နယ် အိန္ဒိယနယ်စပ်အနီးရှိ အိမ်ခြေ ၂၉လုံးသာရှိသော ချင်းရွာလေးတစ်ရွာကို စစ်ကောင်စီတပ်က မီးရှို့ဖျက်ဆီးသွားကြောင်း သတင်းရရှိသည်။
ကွန်းတောင်းရွာသစ်ဟုခေါ်သော အဆိုပါ ချင်းရွာကို စစ်ကောင်စီတပ်က မတ်လ ၂၆ရက်တွင် မီးရှို့ဖျက်ဆီးခဲ့ခြင်းဖြစ်သည်။
“ ရွာက ချင်းရွာလေး။ တစ်ရွာလုံးမှ ၂၉အိမ်ပဲရှိတာ။ ၅ လုံးပဲ ကျန်တယ်။ ကျန်တာ အကုန်မီးထဲပါသွားတယ်” ဟု တမူးမြို့ခံတစ်ဦးက ပြောသည်။
မီးရှို့ဖျက်ဆီးမှုကြောင့် ဒေသခံများအားလုံး ထွက်ပြေး တိမ်းရှောင်နေရပြီး မတ်လ ၂၇ရက်မှ ကျေးရွာသို့ ပြန်ဝင်ကြည့်နိုင်ကြသည်ဟု ဆိုသည်။
“ ရှို့တုန်းက အဝေးကနေ မီးညွန့်ကို လှမ်းကြည့်နေရတာပေါ့ဗျာ။ စစ်ကြောင်းမရှိတော့လို့ ပြန်ကြည့်တော့ ရွာကပြာကျနေပြီ” ဟု ဒေသခံတစ်ဦးက ပြောသည်။
ကွန်းတောင်းရွာအနီးတွင် မတ်လ ၂၃ရက်နောက်ပိုင်း တိုက်ပွဲများဖြစ်ခဲ့ပြီး စစ်ကောင်စီတပ် အထိနာကာ လေကြောင်းမှ လာတိုက်ခိုက်ခဲ့သည်။
ကွန်းတောင်းစခန်းအား စစ်ကောင်စီကတိုက်ခိုက်နေစဉ် တမူးမြို့အခြေစိုက်အမျိုးသားလွတ်မြောက်ရေးတပ်တော်က ဦးဆောင်ကာ ကလေး-တမူးလမ်းရှိ ဘုက္ကန်ရဲကင်းကို ဝင်ရောက်စီးနင်းတိုက်ခိုက်ခဲ့သည်။ စခန်းအား သိမ်းပိုက် နိုင်ခဲ့ပြီး လက်နက်ငယ်မျိူးစုံ ၁၅လက်နှင့် ကျည်ဆန်၂၀၀၀ ကျော်အပါအဝင် လက်နက်ခဲယမ်းအများအပြားကို ပြည်သူ့ကာကွယ်ရေးတပ်ဖွဲ့ဘက်က သိမ်းဆည်းနိုင်ခဲ့သည်။
ထို့နောက်ပိုင်းတွင် စစ်ကောင်စီက ကွန်းတောင်းရွာသစ်ကို မီးရှို့ခြင်းဖြစ်သည်။တမူးမြို့သည် အိန္ဒိယနိုင်ငံနှင့် နယ်စပ်မြို့ဖြစ်ပြီး စစ်ကောင်စီ၏ အကြမ်းဖက်မှုများကြောင့် တမူးဒေသခံ ၃၀၀၀ ထက်မနည်းသည် အိန္ဒိယနိုင်ငံ မဏိပူရ်ပြည်နယ် ဘက်သို့ ထွက်ပြေးတိမ်းရှောင်နေရသည်။
