ကရင်ပြည်နယ် လိပ်သိုမြို့နယ်အတွင်းရှိ စစ်တပ်စခန်းနှစ်ခုကို ယနေ့နံနက်ပိုင်းက KNLA တပ်မဟာ(၂) ပူးပေါင်းတပ်ဖွဲ့များက ထပ်မံဝင်ရောက်တိုက်ခိုက်ခဲ့ပြီး စစ်ကောင်စီတပ်ဘက်မှ ဒုရင်းမှူးတစ်ဦးအပါအဝင် တပ်သားအချို့ သေဆုံးခဲ့သည်ဟု တပ်မဟာ(၂)သတင်းရင်းမြစ်ထံမှ သိရသည်။
ယနေ့ မတ်လ(၂၈)ရက် နံနက်(၁၀)နာရီအချိန်ခန့်၌ ကေအဲန်ယူ တောအူး(တောင်ငူ)ခရိုင် လိပ်သိုမြို့နယ်အတွင်းရှိ စစ်ကောင်စီတပ်၏ သံမိုးတောင်စခန်းနှင့် ကျောက်လုံးကြီးစခန်းများကို ကရင်အမျိုးသားလွတ်မြောက်ရေးတပ်မတော်(KNLA) တပ်မဟာ(၂) တပ်ရင်း(၅) ပူးပေါင်းအဖွဲ့များက ထပ်မံ ဝင်ရောက်တိုက်ခိုက်ခဲ့သည်။
အဆိုပါတိုက်ခိုက်မှုအတွင်း ကျောက်လုံးကြီးစခန်းရှိ စစ်ကောင်စီတပ်ဘက်မှ ဒုတပ်ရင်းမှူးတစ်ဦးအပါအဝင် တပ်သားအချို့သေဆုံးခဲ့ပြီး အများအပြား ဒဏ်ရာရရှိခဲ့ကြောင်း တပ်မဟာ(၂)သတင်းရင်းမြစ်ထံမှ သိရသည်။
မတ်လ(၂၇)ရက်ကလည်း လိပ်သိုမြို့နယ်အတွင်းရှိ စစ်ကောင်စီတပ်၏ သံမိုးတောင်၊ ကျောက်လုံးကြီး၊ ထုံးဘိုကြီးနှင့် ဗဟုန်းတပ်စခန်းများကို KNLA တပ်ရင်း(၅)ပူးပေါင်းတပ်ဖွဲ့များက လက်နက်ကြီး၊ လက်နက်ငယ်များဖြင့် တပြိုင်နက်တည်း ဝင်ရောက်တိုက်ခိုက်ခဲ့ပြီး စစ်ကောင်စီတပ်ဘက်က လက်နက်ကြီး လေယာဉ်များနှင့် ပြန်ပစ်ခဲ့သည်ဟု မြေပြင်သတင်းရင်းမြစ်များက ပြောသည်။
