ကရင်နီပြည်နယ် မြန်မာ – ထိုင်းနယ်စပ် မှတ်တိုင် BP- ၁၁ရှိ စစ်ကောင်စီ ခြေကုပ်စခန်းအား သိမ်းပိုက်နိုင်ခဲ့ကြောင်း ကရင်နီတပ်မတော်(KA) တပ်ရင်း(၅)က သတင်းထုတ်ပြန်သည်။
မတ်လ ၂၄ရက်က သိမ်းယူနိုင်ခဲ့ခြင်းဖြစ်ကြောင်း ထုတ်ပြန်ထားပြီး တိုက်ပွဲအခြေအနေအသေးစိတ်ကိုမူ ဖော်ပြထားခြင်းမရှိသေးပေ။
အဆိုပါ စစ်တပ်စခန်းသိမ်းပိုက်မှုနှင့်ပတ်သက်ပြီး ကရင်နီ စစ်ဘက်ဆိုင်ရာ ဗဟို သတင်းထုတ်ပြန်ရေးအဖွဲ့အား People’s Spring ကဆက်သွယ်မေးမြန်းရန်ကြိုးစားနေသော်လည်း အဆက်အသွယ်မရသေးပေ။
အဆိုပါ နယ်စပ်မှတ်တိုင် BP-11 အနီး သံလွင်အရှေ့ခြမ်းရှိစစ်ကောင်စီ၏ ဟွေ့ဟိုင်းစခန်းကို မတ်လ ၁၆ရက်က တိုက်ခိုက်သိမ်းပိုက်ခဲ့ကြောင်း ကရင်နီတပ်က မတ်လ ၁၇ရက်တွင် အသိပေးထားခဲ့သေးသည်။ ယင်းသိမ်းပိုက်မှုတွင် စစ်ကောင်စီတပ်ထံမှ RPG၊ (၆၀)မမ နှင့် လက်နက်ငယ်အချို့ ၊ ကျည်များ ဗုံးသီးများရရှိခဲ့ကြောင်း ဓာတ်ပုံများနှင့်တကွ ဖော်ပြသည်။
ထိုစဉ်က စစ်ကောင်စီတပ်မှ အလောင်း ၃လောင်း တွေ့ရှိရပြီး ၆ဦးမှာ လက်နက်မဲ့ဖြင့် ထွက်ပြေးလွတ်မြောက်သွားသည်ဟု KA တပ်ရင်း(၅)က ထုတ်ပြန်ခဲ့သည်။ ယင်းတိုက်ပွဲ၌ စစ်ကောင်စီတပ်မှ တိုက်လေယာဉ်များဖြင့် ဗုံးကြဲတိုက်ခိုက်ခဲ့ကြောင်း၊ KA ဘက်မှ ရဲဘော် ၃ဦး ကျဆုံးကာ တစ်ဦးဒဏ်ရာရရှိခဲ့ကြောင်း ဖော်ပြသည်။
ကရင်နီတပ်မတော်အနေဖြင့် နယ်စပ်ရှိ စစ်ကောင်စီတပ်စခန်းများအား တိုက်ခိုက်ခြင်းအပြင် လက်နက်ခဲယမ်း ရိက္ခာပို့လာသည့် စစ်ကြောင်းများကိုလည်း တိုက်ခိုက်ခဲ့ရာ စစ်ကောင်စီတပ်မှ အထိနာခဲ့သည်။
