တောင်ပိုင်းစစ်ဒေသ၊ စစ်ဒေသခွဲ အမှတ်(၃)အတွင်း အမျိုးသားညီညွတ်ရေးအစိုးရ (NUG) ၏ ပညာရေးဝန်ကြီးဌာနနှင့် ကာကွယ်ရေးဝန်ကြီးဌာနတို့ပူးပေါင်းကာ တက္ကသိုလ်ဝင်တန်းစာမေးပွဲပြုလုပ်ခဲ့ကြောင်း သတင်းနှင့်ပြန်ကြားရေးဌာန စစ်ဒေသခွဲအမှတ်(၃)က ယနေ့ (မတ်လ ၂၈) တွင် အသိပေး ဖော်ပြသည်။
အဆိုပါတက္ကသိုလ်ဝင်တန်းစာမေးပွဲကို တောင်ပိုင်းစစ်ဒေသ၊ စစ်ဒေသခွဲ အမှတ်(၃)အတွင်းရှိ ပြည်သူ့ကာကွယ်ရေးတပ်မတော် PDF ရဲဘော်၊ ရဲမေများနှင့် ဒေသခံပြည်သူများမှ ဝင်ရောက်ဖြေဆိုခဲ့ကြကြောင်း သိရသည်။
စာမေးပွဲဖြေဆိုသည့် ကာလအတွင်းတွင်လည်း ဝင်ရောက်ဖြေဆိုသည့် ရဲဘော်၊ ရဲမေများနှင့် ဒေသခံပြည်သူများအတွက် လုံခြုံရေးနှင့် အရေးပေါ် ကျန်းမာရေး စောင့်ရှောက်မှုများကို စနစ်တကျစုဖွဲ့ပြင်ဆင်ထားရှိခဲ့ပြီး နယ်မြေခံ စစ်ကြောင်းမှ PDF ရဲဘော်များက တာဝန်ယူဆောင်ရွက်ပေးခဲ့ကြောင်းလည် စစ်ဒေသခွဲအမှတ်(၃) က ဖော်ပြထားသည်။
ထို့အပြင် PDF ရဲဘော်၊ ရဲမေများနှင့် ဒေသခံပြည်သူများမှ စာမေးပွဲဖြေဆိုပြီးနောက်နေ့တွင် စာသင်ကြားပေးသည့် ဆရာ၊ ဆရာမများနှင့် တာဝန်ရှိသူများကို ဦးညွှတ်ကန်တော့ခဲ့ကြသည်ဟု ဆိုသည်။
အမျိုးသားညီညွတ်ရေးအစိုးရ (NUG) ၏ ပညာရေးဝန်ကြီးဌာနနှင့် ကာကွယ်ရေးဝန်ကြီးဌာနအနေဖြင့် PDF ရဲဘော်များ၏ ပညာသင်ယူမှု အခွင့်အရေးကို မဆုံးရှုံးစေရန်နှင့် လူငယ်များ၏ ပညာသင်ယူလိုစိတ် မပျောက်စေရန်အတွက် တာဝန်ယူဆောင်ရွက်ခြင်း ဖြစ်ကြောင်းလည်း NUG က ထုတ်ပြန်သည်။
