▪︎မုံရွာမြို့တွင်လည်း ကင်းလှည့်စစ်ကောင်စီတပ်သားများအား ပစ်ခတ်တိုက်ခိုက်
စစ်ကိုင်းတိုင်း၊ ရွှေဘိုမြို့ ကုန်းလမ်းပို့ဆောင်ရေးညွှန်ကြားမှုဦးစီးဌာန(ကညန)ရုံးရှိ စစ်ကောင်စီတပ်ကို လက်ပစ်ဗုံးဖြင့် ပစ်ခတ်တိုက်ခိုက်ခဲ့ပြီး မုံရွာမြို့တွင်လည်း ကင်းပတ်နေသော စစ်ကောင်စီတပ်ကို မိုင်းဆွဲတိုက်ခိုက်ကြောင်း ဒေသတွင်းတော်လှန်ရေးအင်အားစုများက ပြောသည်။
ယမန်နေ့(မတ်လ ၃ ရက်)မွန်းလွဲ ၂နာရီကျော်က ရွှေဘိုမြို့ ကညနရုံး၌ ကင်းစောင့်နေသော စစ်ကောင်စီတပ်များအား ရွှေဘိုခရိုင်အမှတ် (၂၃)တပ်ရင်း (တပ်ခွဲ၁) Naungyoe Armyနှင့် ရွှေဘိုကျားကြီးအဖွဲ့တို့က လက်ပစ်မိုင်းများဖြင့် ပစ်ခတ်တိုက်ခိုက်ခဲ့ကြောင်း တပ်ရင်းအမှတ်(၂၃) တပ်ရင်းမှူး ဗိုလ်ရန်ကြီးက ပြောကြားသည်။
စစ်အုပ်စုက ပြန်လည်ပစ်ခတ်သော်လည်း အထိအခိုက်မရှိဆုတ်ခွာခဲ့ပြီး မြို့ရှောင်လမ်းတွင် စစ်ကောင်စီကင်းပုန်းများကိုလည်း လက်ပစ်မိုင်းဖြင့်ထပ်မံတိုက်ခိုက်ခဲ့ကြောင်း ၎င်းက ပြောသည်။
“ကညနရုံးထဲက မျက်မြင်ပြည်သူပြောတာကတော့ တစ်ကောင်သေတယ်။ ကညနရုံးထဲမှာ သုံးလေးလုံးလောက်ပစ်သွင်းဖို့ရာ သူတို့ဘက်က မမျှော်လင့်ဘဲ ပြန်ပစ်တဲ့အတွက် ဒုတိယအစီအစဥ်ဖြစ်တဲ့ မြို့ရှောင်လမ်းမှာ သူတို့ကင်းပုန်းချထားတဲ့နေရာကို ကြိုတင်သိလို့ သွားရင်းလက်ပစ်နဲ့ပစ်ခဲ့တာပါ။”ဟု ဗိုလ်ရန်ကြီးက ပြောကြားသည်။
ထို့အပြင် ဧပြီ ၂ ရက်နေ့ မွန်းလွဲပိုင်းကလည်း မုံရွာမြို့၊ မြို့ပတ်လမ်းတွင် ကင်းလှည့်နေသော စစ်ကောင်စီတပ် ယာဥ်တစ်စီးကို မိုင်းဆွဲတိုက်ခိုက်ခဲ့ရာ ကားထိခိုက်မှုရှိကြောင်း မုံရွာ နတ်ဆိုးတပ်ဖွဲ့ခေါင်းဆောင် ဗိုလ်နတ်ဆိုးက ပြောကြားသည်။
“ကင်းပတ်နေတဲ့ကားကို မိုင်းဆွဲတာပါ။အင်အား၅ယောက်လောက်ပါတယ်။ သေမသေတော့အတိကျမသိရသေးဘူး။”ဟု ဗိုလ်နတ်ဆိုးက ပြောသည်။
ထိုနေ့ နံနက်ပိုင်းကပင် မုံရွာနတ်ဆိုးအဖွဲ့သည် မုံရွာတောင်ရပ်ကွက်ရှိ မြဝတီဘဏ်နှင့်စီးပွားရေးဘဏ်ရှေ့၌ ကင်းစောင့်နေသော စစ်ကောင်စီတပ်သားများအား ပစ်ခတ်တိုက်ခိုက်ရာ လေးဦးသေဆုံးခဲ့ပြီး PDFအဖွဲ့၏ ယာဥ်တစ်စီး ဆုံးရှုံးခဲ့သည်။
