စစ်ကိုင်းတိုင်း၊ ကနီမြို့နယ်၊ သရက်တောကျေးရွာအနီးတွင် စစ်ကောင်စီတပ်နှင့် မဟာမိတ်အဖွဲ့များ အနီးကပ်တိုက်ပွဲဖြစ်ပွားရာ စစ်ကောင်စီတပ်သား သုံးဦးသေဆုံးကြောင်း အာဏာရှင်တော်လှန်ရေး ပြည်သူ့တပ်မတော်(DRPA)က သတင်းထုတ်ပြန်သည်။
ဧပြီ ၄ ရက် နေ့လည် ၁၂ နာရီဝန်းကျင်က ကနီမြို့နယ် အလယ်ကျွန်းကျေးရွာရှိ စစ်ကောင်စီတပ်မှ အင်အား ၅၀ ကျော်အပါအဝင် ပျူစောထီးများနှင့် ဒေသမဟာမိတ်တပ်ဖွဲ့များ သရက်တောရွာ အနောက်မြောက်ဘက်မီတာ ၁၀၀ အတွင်း၌ အနီးကပ်တိုက်ပွဲဖြစ်ပွားခဲ့ကြောင်း DRPA၏ သတင်းနှင့် ပြန်ကြားရေးတာဝန်ခံက ပြောသည်။
တိုက်ပွဲမှာ ၁နာရီခွဲဝန်းကျင် ကြာမြင့်ခဲ့ပြီး စစ်ကောင်စီတပ်သား သုံးဦးသေဆုံးခဲ့ကာ စစ်ကောင်စီဘက်က အထိအခိုက်အများအပြားဖြင့် ဆုတ်ခွာသွားသည်ဟု DRPA၏ သတင်းနှင့် ပြန်ကြားရေးတာဝန်ခံက ဆိုသည်။
မဟာမိတ်အဖွဲ့မှ ရဲဘော် တစ်ဦးလည်း သေနတ်ချို့ယွင်းမှုဖြစ်ကာ ထိခိုက်ဒဏ်ရာရရှိခဲ့ကြောင်း သိရသည်။
“ဆယ်ဧကလောက်ခြားတယ်။ မိုင်းကွင်းထဲကို စစ်ကြောင်းထိုးဖို့ဆိုပြီးလာတာ။ လာတဲ့အခါမိုင်းကွင်းမှန်းသိတော့ အရင်မဖြတ်ဘူး။ နွားအုပ်ကို အရင်ဖြတ်ခိုင်းတာ။ နွားလေးကောင်အရင်ကျော်လာလို့ ကျွန်တော်တို့ကသိမ်းထားလိုက်တယ်။ ၃ကောင်ကတော့မိုင်းကွင်းဖြတ်ရင်းသေသွားတယ်။အဲဒီမှာတိုက်ပွဲဖြစ်တယ်။ သူတို့ကျတဲ့သူတွေကိုပြန်ထုတ်သွားတာကိုမြင်လိုက်ရတယ်။”ဟု DRPA၏ သတင်းနှင့် ပြန်ကြားရေးတာဝန်ခံက ပြောသည်။
အဆိုပါ စစ်ဆင်ရေးကို DRPA၊ ခရိုင်ရင်း (၂)၊ အမေ့သားကျားသုံးဖော်နှင့် KPDF 1မှ KGF တပ်ခွဲတို့ ပူးပေါင်းတိုက်ခိုက်ခဲ့ကြောင်း အသိပေးထားသည်။
မတ်လ ၃၀ ရက်ကလည်း ကနီမြို့ပေါ်တွင် ကင်းစောင့်ရန် ထွက်လာသည့် စစ်ကောင်စီတပ် သားများအား ကျောက်လုံးကြီး KLG တပ်မဟာနှင့်ဒေသတွင်းမဟာမိတ်အဖွဲ့များက တိုက်ခိုက်ခဲ့ရာ စစ်အုပ်စုဘက်က နှစ်ဦးသေဆုံးပြီး နှစ်ဦး ဒဏ်ရာရရှိခဲ့သည်။
