တော်လှန်ရေးခရီးတစ်လျှောက် ပေးဆပ်အနစ်နာခံမှုများ အလဟဿ မဖြစ်စေဘဲ ဖက်ဒရယ် ဒီမိုကရေစီပြည်ထောင်စုတည်ဆောက်ရေးတွင်ကယန်းယူမျိုးများနှင့်ညီနောင်တိုင်းရင်းသားများ အတူတကွ လက်တွဲ၍ အောင်ပွဲခရီးလမ်းဆုံးတိုင် ညီညွတ်စွာ ဆက်လက်ကြိုးပမ်း ဆောင်ရွက်နိုင်ပါစေဟု အမျိုးသားညီညွတ်ရေးအစိုးရ(NUG)ကကယန်းအမျိုးသားနေ့သို့ ပေးပို့သည့် သဝဏ်လွှာ၌ ဖော်ပြသည်။
ကရင်နီ(ကယား)ပြည်နယ်အတွင်းနေထိုင်ကြသည့် ကယန်းအမျိုးသားများ တစုတစည်းတည်းအဖြစ် အမျိုးသားအလံတော် တစ်ခုအောက်တွင်ပေါင်းဆုံခဲ့ကြသည့်နေ့ထူးနေ့မြတ်ကို အစွဲပြု၍ ဧပြီ ၁၀ရက် ရောက်တိုင်း ကယန်းအမျိုးသားနေ့ ကျင်းပလာခဲ့ရာ ၂၃နှစ်မြောက် နှစ်ပတ်လည်သို့ ရောက်ရှိပြီဖြစ်သည်။
ကယန်းလူမျိုးများနေထိုင်ရာဒေသများတွင်စစ်အာဏာရှင်စနစ် အပါအဝင် အာဏာရှင်စနစ်ဟူသမျှကို ပြတ်ပြတ်သားသား ဆန့်ကျင်တိုက်ဖျက်ပြီး တိုင်းရင်းသားလူမျိုးများအားလုံးအတွက် တန်းတူညီမျှမှု၊ အာမခံချက်ရှိသော ဖက်ဒရယ်ဒီမိုကရေစီ ပြည်ထောင်စု တည်ဆောက်ရေးအတွက် တိုက်ပွဲများတွင် ပေးဆပ်အနစ်နာခံကာ စွမ်းစွမ်းတမံ ပါဝင်နေသည့် မဟာမိတ် ကယန်းအမျိုးသားများ၏ ကြိုးပမ်းအားထုတ်မှု ပေးဆပ်အနစ်နာခံမှုများကို များစွာ အသိအမှတ်ပြုကြောင်း NUG၏ သဝဏ်လွှာ၌ ပါရှိသည်။
လက်ရှိတွင် နိုင်ငံရေး၊ စစ်ရေး၊ စီးပွားရေး၊ နိုင်ငံခြားရေး အဖက်ဖက်မှ ဖိအားများကြောင့် အင်အားချိနဲ့ နေပြီဖြစ်သော စစ်အုပ်စုကို နိုင်ငံရေးမှ အပြီးတိုင် စွန့်ခွာသွားအောင် ကြိုးပမ်းနိုင်မှသာ တိုင်းရင်းသား ပြည်သူလူထုများ လိုလားသည့် အမျိုးသား တန်းတူရေး၊ လူ့အခွင့်အရေး နှင့် ဒီမိုကရေစီ အာမခံချက်များကို ပြည်ပြည့်၀၀ လိုက်နာပြီး သာယာ၀ပြောသော ဖက်ဒရယ်ဒီမိုကရေစီနိုင်ငံတောသစ် ပန်းတိုင်သို့ ရောက်ရှိ အကောင်အထည်ဖော်နိုင်မည်ဖြစ်ကြောင်း NUGက ဆိုသည်။
သွေးခွဲသပ်လျှိုခြင်း၊ လူမဆန်ရက်စက်ကြမ်းကြုပ်ခြင်းစသည့် အကြမ်းဖက် စစ်ကောင်စီ၏ ဗျူဟာများကို မျက်ခြေပြတ်မခံဘဲ ကယန်းအမျိုးသားများ၏ စုစည်းမှုနှင့် စည်းလုံးညီညွတ်မှု၊ ကယန်းအမျိုးသားများနှင့် ကျန်တော်လှန်ရေးအင်အားစုများကြား ယုံကြည်မှု၊ နားလည်မှု၊ စည်းစည်းမှုတို့ကို မထိခိုက်စေရန်လည်း အမြဲ အထူးသတိရှိကြရမည်ဟုလည်း NUGက သဝဏ်လွှာပေးပို့ခဲ့သည်။
