စစ်ကိုင်းတိုင်း ဗန်းမောက်မြို့နယ် သာယာကုန်းကျေးရွာကို စစ်ကောင်စီက ယနေ့ နေ့လည်ပိုင်းတွင် လေကြောင်းမှ ဗုံးကြဲတိုက်ခိုက်ခဲ့ရာ ရွာသား ငါးဦး ဒဏ်ရာရရှိခဲ့ကြောင်း Banmauk Revolution က သတင်းထုတ်ပြန်သည်။
ယနေ့ (ဧပြီ ၁၂ရက်) နေ့လည် ၁နာရီခွဲတွင် ဗန်းမောက်မြို့ အနောက်ဖက် ပင်ဟင်းခါးကျေးရွာအုပ်စု သာယာကုန်းရွာထဲသို့ ဂျက်ဖိုက်တာဖြင့် ဗုံးကြဲသွားရာ နေအိမ်အချို့ထိခိုက်ပျက်စီးပြီး ရွာသား ငါးဦး ဒဏ်ရာရရှိခဲ့ရာ တစ်ဦးမှာ ဒဏ်ရာပြင်းထန်သည်ဟု ဖော်ပြထားသည်။
စစ်ကောင်စီတပ်သည် ဗန်းမောက်နယ်ရှိ ကျေးရွာများကို လေကြောင်းတိုက်ခိုက်မှုများ မကြာခဏ လုပ်ဆောင်ခဲ့သည်။
ဧပြီ ၈ရက်ကလည်း ဗန်းမောက်နယ် ကြောင်လည် ကျေးရွာကို လေကြောင်းတိုက်ခိုက်ခဲ့ပြီး မတ်လ ၂၆ရက်ကလည်း ကြောင်လည်ရွာ၊ မတ်လ ၂၄ရက်တွင် နန့်နန့်ထွန်- ကျောက်ဆည်ရွာတို့ကို လေကြောင်းတိုက်ခိုက်ခဲ့သည်ဟု ဆိုသည်။
ဗန်းမောက်နယ်တွင် ဒေသခံကာကွယ်ရေးတပ် (PDF)နှင့် ကချင်လွတ်လပ်ရေးတပ်မတော်(KIA) တို့ ပူးပေါင်းပြီး စစ်ကောင်စီတပ်ကို တိုက်ခိုက်လျက်ရှိသည်။
စစ်ကောင်စီတပ်သည် ယခု ရက်ပိုင်းအတွင်း ချင်းပြည်နယ်နှင့် စစ်ကိုင်းတိုင်းရှိ ကျေးရွများကို ပစ်မှတ်ထား လေကြောင်း တိုက်ခိုက်မှုလုပ်ဆောင်ခဲ့၍ အရပ်သားပြည်သူ သေဆုံးထိခိုက်များ ဖြစ်ပေါ်ခဲ့ရသည်။
