မလေးရှား နိုင်ငံမှာ ငါးပူတင်း စားမိရာက သက်ကြီးရွယ်အို ဇနီးမောင်နှံနှစ်ဦး ရက်ပိုင်းလောက်ခြားပြီး သေဆုံးကုန်ကြောင်း သိရပါတယ်။
ဂျိုဟော် ဒေသမှာ နေထိုင်တဲ့ အသက် ၈၄ နှစ်အရွယ် အဖိုးအို တစ်ဦးဟာ ဧပြီ ၈ ရက်က အစာအဆိပ်သင့်ပြီး ဆေးရုံမှာ သေဆုံးသွားခဲ့တယ်လို့ ဒေသခံ မီဒီယာတွေက ဖော်ပြကြပါတယ်။ သူ့ရဲ့ အသက် ၈၃ နှစ်အရွယ် ဇနီးဟာလည်း သူနဲ့အတူ ငါးပူတင်း စားမိရာက မတ်လ ၂၅ ရက်မှာ အသက်ဆုံးရှုံးခဲ့ပြီး ဖြစ်ပါတယ်။
ဂျိုဟော်မှာရှိတဲ့ ကလူအန် ဧရိယာမှာ နေထိုင်ကြတဲ့ ဇနီးမောင်နှံဟာ Facebookပေါ်က အွန်လိုင်း စျေးသည် တစ်ယောက်ဆီကနေ ငါးပူတင်းတွေကို မှာယူ စားသောက်ခဲ့ပြီး အစာအဆိပ် သင့်ခဲ့တာပါ။
အဲဒီနောက် အဖွားအိုက အရင်ဆုံး ကွယ်လွန်ခဲ့တာ ဖြစ်ပါတယ်။ ဇနီးကွယ်လွန်ပြီး လဝက်လောက် အကြာမှာ အဖိုးအိုလည်း သေဆုံးသွားခဲ့ပါတယ်။ ဆေးရုံက ဆရာဝန်တွေကတော့ သေမှုသေခင်း အကြောင်းရင်းဟာ ငါးပူတင်းကြောင့် အစာအဆိပ်သင့်ခဲ့တာလို့ အတည်ပြုသွားပါတယ်။
ငါးပူတင်း အဆိပ်သင့်ရာက လူနာနှစ်ဦးစလုံးဟာ အသက်ရှူ လမ်းကြောင်းနဲ့ နှလုံး ထိခိုက် ပျက်စီးမှုတွေ သက်ရောက် ခံစားခဲ့ရကြောင်း ဆေးရုံရဲ့ တာဝန်ရှိသူတွေက ပြောပါတယ်။
ဒီဖြစ်စဉ်ကို အကြောင်းပြုပြီး ဒေသဆိုင်ရာ အာဏာပိုင်တွေက ငါးရောင်းချသူတွေ အနေနဲ့ ငါးပူတင်း အသားတွေ ထည့်သွင်း ရောင်းချမှုကို ရှောင်ရှားကြဖို့ နှိုးဆော် အသိပေးထားပါတယ်။ ပြီးတော့ ပြည်သူတွေကလည်း ငါးပူတင်းတွေကို အရဲစွန့်ပြီး စားသောက်တာမျိုး မလုပ်ကြဖို့ ဆော်ဩ တိုက်တွန်းထားပါတယ်။
ငါးပူတင်းမှာ လူကို သေစေလောက်တဲ့ထိ ပြင်းထန်တဲ့ အဆိပ်မျိုး ထုတ်လွှတ်နိုင်စွမ်း ရှိတာကြောင့် စနစ်တကျ သန့်စင်ဖယ်ရှားထားတာ မဟုတ်တဲ့ အသားမျိုးကို စားမိရင် ဥပါဒ် ဖြစ်စေနိုင်ကြောင်း သိရပါတယ်။
