မြောက်ကိုရီးယားဟာ လောင်စာခဲကို အသုံးပြုတဲ့ တိုက်ချင်းပစ် ဒုံးကျည် (ICBM) တစ်စင်းကို နိုင်ငံရဲ့ သမိုင်းတလျှောက်မှာ ပထမဆုံး အကြိမ်အဖြစ် အောင်အောင်မြင်မြင် စမ်းသပ် လွှတ်တင်ခဲ့ပါတယ်။
မြောက်ကိုရီးယားရဲ့ ရှိရင်းစွဲ ICBMတွေထက် ပိုပြီး အားကောင်းတဲ့၊ ပိုပြီး ခေတ်မီတဲ့ ဒုံးကျည်တွေ ထုတ်လုပ်ဖို့ အာသီသ ပြင်းပြနေတဲ့ မြောက်ကိုရီးယား ခေါင်းဆောင် ကင်မ်ဂျုံအန်းအတွက် အခုကိစ္စက အရေးပါတဲ့ အောင်မြင်မှု ခြေလှမ်းတစ်ခုလို့ သတ်မှတ်နိုင်ပါတယ်။
Hwasong-18လို့ နာမည်ပေးထားတဲ့ ဒုံးကျည်ကို ဧပြီ ၁၃ ရက် မနက်ပိုင်းမှာ ပစ်လွှတ်ခဲ့ကြောင်း မြောက်ကိုရီးယား အစိုးရပိုင် KCNA သတင်းဌာနကလည်း အတည်ပြုခဲ့ပါတယ်။ ဒုံးကျည် ပစ်လွှတ်မှုကို မြောက်ကိုရီးယားရဲ့ ခေါင်းဆောင်ကြီး ကင်မ်က သမီးဖြစ်သူနဲ့အတူ တက်ရောက်ကြည့်ရှုခဲ့သလို ကိုယ်တိုင် ကွပ်ကဲခဲ့ကြောင်း KCNAက ဖော်ပြထားပါတယ်။
မြောက်ကိုရီးယားရဲ့ ဒုံးကျည် စမ်းသပ်မှုကို ဂျပန်နဲ့ တောင်ကိုရီးယားတို့က ထောက်လှမ်း စောင့်ကြည့်ခဲ့ကြသလို ဂျပန်အစိုးရဟာ မြောက်ပိုင်း ဟော့ကိုင်းဒိုးကျွန်းမှာ နေထိုင်တဲ့ ဒေသခံ တချို့ကိုပါ ယာယီ ရွှေ့ပြောင်းဖို့ အရေးပေါ် ညွှန်ကြားခဲ့ရပါတယ်။
KCNAက ICBM အမျိုးအစားသစ်ကို ဧပြီ ၁၃ ရက် မနက်ပိုင်းမှာ စမ်းသပ် အောင်မြင်ခဲ့ပြီး မဟာဗျူဟာ စစ်ရေး ခွန်အားသစ် တစ်ခုကို ယူဆောင်လာနိုင်ခဲ့ပြီလို့ ညွှန်းဆိုသွားခဲ့ပါတယ်။
မြောက်ကိုရီးယားဟာ အရင်ကတည်းက ဒုံးကျည် အမျိုးအစားပေါင်းစုံ စမ်းသပ် ပစ်ခတ်ခဲ့ဖူးပေမယ့် အားလုံးက လောင်စာ အရည်ကို အသုံးပြုထားတဲ့ အမျိုးအစားတွေပါ။ လောင်စာခဲ နည်းပညာကတော့ ပစ်လွှတ်ဖို့ စီစဉ်တဲ့အချိန် အများကြီး ယူစရာ မလိုတော့သလို ဒုံးကျည်ရဲ့ ကွေ့ဝိုက်ပျံသန်းနိုင်စွမ်းကိုပါ မြှင့်တင်ပေးတဲ့ အားသာချက်မျိုးတွေ ပိုင်ဆိုင်ထားပါတယ်။
၂၀၂၁ တုန်းက ကင်မ်ကိုယ်တိုင် ကြေညာခဲ့တဲ့ စစ်လက်နက် မြှင့်တင်ရေး ၅ နှစ် စီမံကိန်းမှာ လောင်စာခဲတောင့် နည်းပညာသုံး ICBMတွေ ထုတ်လုပ်ရေးလည်း ပါဝင်နေပါတယ်။
ကုလသမဂ္ဂနဲ့ နိုင်ငံတကာရဲ့ ဖိအားပေး ပိတ်ဆို့မှုတွေ ရှိနေတဲ့တိုင် မြောက်ကိုရီးယားဟာ ပြီးခဲ့တဲ့ နှစ်ပိုင်းတွေအတွင်း ဒုံးကျည် စမ်းသပ်မှုတွေကို အရေအတွက် အမြောက်အမြား ပြုလုပ်နေဆဲ ဖြစ်ပါတယ်။
