ဧရာဝတီတိုင်း၊ အင်္ဂပူမြို့ရှိသင်္ကြန်ဗဟိုမဏ္ဍပ်ယနေ့နံနက်ပိုင်းကဗုံးပေါက်ကွဲသဖြင့်စစ်ကောင်စီ၏ ရဲအချို့ ဒဏ်ရာရသွားကြောင်း ဒေသခံများကပြောသည်။
အင်္ဂပူမြို့ ပညာရေးမှူးရုံးလမ်းဆုံရှိ သင်္ကြန်ဗဟိုမဏ္ဍပ်တွင် ယနေ့ (ဧပြီလ ၁၅ ရက်) နံနက် ၇ နာရီ ၄၅ မိနစ်ခန့်က ဗုံးတစ်လုံးပေါက်ကွဲခဲ့ခြင်းဖြစ်သည်။
” ရဲအရာရှိတစ်ယောက် အပါအဝင် သုံးယောက် ထိတယ်ကြားတယ်။ ဆေးရုံကားတွေလာခေါ်သွားတယ်”ဟု အင်္ဂပူမြို့ခံတစ်ဦးကပြောသည်။
ယနေ့နံနက်အစောပိုင်း မဏ္ဍပ်သို့ပြည်သူများမရောက်ခင် စစ်ကောင်စီတပ်ဖွဲ့ဝင်များသာရှိနေချိန်တွင် ဗုံးပေါက်ကွဲခဲ့ခြင်းဖြစ်ကြောင်း ဒေသခံအချို့ကပြောသည်။
“သင်္ကြန်ကမနေ့ကလည်းလူမရှိပါဘူး။စစ်တပ်ကတော့တောဘက်ကလူတွေ ခေါ်လာတယ်ကြားတယ်”ဟု ဒေသခံတစ်ဦးကပြောသည်။
အင်္ဂပူမြို့သည် ဟင်္သာတခရိုင်အတွင်းပါဝင်ပြီး အင်္ဂပူမြို့သင်္ကြန်ဗဟိုမဏ္ဍပ်ဗုံးခွဲတိုက်ခိုက်ခံရပြီးနောက် စစ်ကောင်စီတပ်က လုံခြုံရေးအင်အားအများအပြားတိုးမြှင့်ချထားကြောင်းသိရသည်။
