ကရင်ပြည်နယ် မြ၀တီမြို့နယ် မဲကနယ်ကျေးရွာအနီး ကျောက်မိုင်းဒေသသို့စစ်ကောင်စီဘက်မှ တိုက်လေယာဉ်များ၊ ဟောင်ဝစ်ဇာများ၊ လက်နက်ကြီးများဖြင့် နေ့ရောညပါ အဆက်မပြတ်ပစ်ခတ်ပြီး ထိုးဖောက်ဝင်ရောက်နိုင်ရန် ကြိုးစားနေဆဲဖြစ်၍ တိုက်ပွဲဆက်လက်ဖြစ်ပွားနေကြောင်းကော်ဘရာ စစ်ကြောင်းက အသိပေးသည်။
ကျောက်မိုင်းဒေသတွင် ကော်ဘရာပါဝင်သည့် ပူးပေါင်းစစ်ကြောင်းနှင့် စစ်ကောင်စီတပ်တို့ တိုက်ပွဲများ ဧပြီဒုတိယပါတ်မှစ၍ ယနေ့(ဧပြီ ၂၂ ရက်) အထိ့တိုက်ပွဲများဆက်တိုက် ဖြစ်ပွားနေခြင်းဖြစ်သည်။
ဧပြီ ၂၂ရက်တွင်စစ်ကောင်စီဘက်က နံနက်(၂)နာရီတွင် YAK130 JetFighterဖြင့် (၃)ကြိမ်ထက်မနည်း ပစ်ခတ်တိုက်ခိုက်ခဲ့ကြောင်း၊ ထို့နောက် နံနက် (၆)နာရီခန့်မှစ၍ ဟောင်ဝစ်ဇာများ၊ လက်နက်ကြီးများဖြင့် ပစ်ခတ်ခဲ့ပြီး စစ်ကြောင်းထိုး ဝင်ရောက်ရန်ကြိုးစားသဖြင့် ကျောက်မိုင်းဒေသတွင် တော်လှန်ရေးပူးပေါင်းအဖွဲ့များဖြင့် အပြန်အလှန်ပစ်ခတ်မှုများ ဖြစ်ပွားခဲ့ကြောင်း ဖော်ပြသည်။
စစ်ကောင်စီ၏တိုက်လေယာဥ်များမှာ နေပြည်တော်လေဆိပ်မှ ထွက်ခွာပျံသန်းခြင်းဖြစ်ကြောင်း စစ်ကောင်စီလေကြောင်းတပ် ပျံသန်းမှု စောင့်ကြည့်သောအဖွဲ့များကပြောသည်။
“ ရန်သူ့ဘက် ထိခိုက်မှုအား စီစစ်ဆဲဖြစ်သည်။ ရန်သူဘက်မှ လေကြောင်းပစ်ကူ၊ လက်နက်ကြီးပစ်ကူများဖြင့် အကြိမ်ရေများစွာပစ်ခတ်ခဲ့တိုက်ခိုက်ခဲ့သော်လည်း မိဘပြည်သူများပို့သသောမေတ္တာကြောင့် မိမိတို့ဘက်မှထိခိုက်မှုတစ်စုံတစ်ရာမရှိခဲ့ပါ” ဟု ကော်ဘရာစစ်ကြောင်းကဧပြီ ၂၂ ရက်ညတွင်ထုတ်ပြန်သည်။
ယနေ့ညတွင်လည်း တိုက်ပွဲများအပြင်းအထန်ဖြစ်ပွားနေကြောင်း PDF တစ်ဦးကပြောသည်။
စစ်ကောင်စီတပ်၏ ရမ်းသန်း ပစ်ခတ်မှုများကြောင့် ပြည်သူလူထုပိုင် နေအိမ်များနှင့် အိမ်မွေးတိရစ္ဆာန်များ ထိခိုက်ပျက်စီးခဲ့သည်ဟုအသိပေးသည်။
ယခင်ရက်များက မဲကနယ်ဒေသ အတွင်း တိုက်ပွဲများ၌ စစ်ကောင်စီတပ် အထိနာခဲ့သည်။
မြဝတီမြို့အနီးတဝိုက်တွင်စစ်ကောင်စီတပ်နှင့် ၎င်းလက်အောက်ခံ BGF တပ် တို့အား ကျားသစ်နက်စစ်ကြောင်း၊ တပ်မဟာ ၆ KNU/KNLA ပူးပေါင်းတပ်ဖွဲ့ ၊ ကော်ဘရာစစ်ကြောင်း (၁) ၊ ကော်ဘရာစစ်ကြောင်း(၂) ၊ Federal Wings ၊ Golden Eagle ၊ရောင်နီတို့နှင့် ပူးပေါင်းပြီးတိုက်ခိုက်လျှက်ရှိသည်။
စစ်ကောင်စီတပ်နှင့် ၎င်းလက်အောက်ခံ BGF တပ်များ မှ နေ၍ လက်နက်ကြီးများ ၊ အတွဲလိုက်ပစ်ဒုံးများဖြင့် နေ့ရောညပါ ပစ်ခတ်လျက်ရှိပြီး ကျားသစ်နက်စစ်ကြောင်းမှ ရဲဘော်တစ်ဦး လက်နက်ကြီးစ ထိမှန်ဒဏ်ရာ(မစိုးရိမ်ရ) ရရှိခဲ့ကြောင်း ကျားသစ်နက်စစ်ကြောင်းကလည်းယနေ့ထုတ်ပြန်သည်။
ထို့အပြင် ကျားသစ်နက်စစ်ကြောင်းမှ ရဲဘော်များက နယ်မြေရှင်းလင်းရေးဆောင်ရွက်ရာစစ်ကောင်စီတပ်မှ ကျန်ရစ်ခဲ့သော လက်နက်၊ ကျည်များ နှင့် အသုံးဆောင်ပစ္စည်းများသိမ်းဆည်းရရှိခဲ့ကြောင်းသိရသည်။
