စစ်ကိုင်းတိုင်း၊ တန့်ဆည်မြို့နယ်၊ ခရမ်းခြံကျေးရွာတွင် စစ်ကောင်စီတပ်ပစ်ခတ်ခဲ့သောမပေါက်ကွဲသေးသည့် ဗုံးသီးတစ်လုံးကို ထုကြည့်ခဲ့ရာ ပေါက်ကွဲမှုဖြစ်ပြီး အမျိုးသမီးတစ်ဦး သေဆုံးပြီး တစ်ဦးဒဏ်ရာရရှိခဲ့ကြောင်း သတင်းရရှိသည်။
ယမန်နေ့ (ဧပြီ ၂၂ ရက်) နံနက်ပိုင်းက ပဲခင်းကြီးတောရကျောင်းအနီးတွင် (၄၀)မမ ဗုံးသီးတစ်လုံးအား ဒေသခံပြည်သူများက တွေ့ရှိခဲ့ကြောင်း၊ ဗုံးသီးအား အသက်(၃၅)နှစ်အရွယ် အမျိုးသမီးတစ်ဦးက ဓားဖြင့်ထုကြည့်ခဲ့ရာ ပေါက်ကွဲမှုဖြစ်ပွားခဲ့ပြီး အဆိုပါ အမျိုးသမီး သေဆုံးကာ အသက်(၆၀)အရွယ် အမျိုးသမီးတစ်ဦးလည်း ထိခိုက်ဒဏ်ရာရရှိခဲ့ကြောင်း ဒေသခံများက ပြောသည်။
“အရင်တိုက်ပွဲတွင်း မပေါက်ကွဲခဲ့တဲ့ ဗုံးသီးကိုတွေ့ရှိပြီး ထုခွဲတာကနေကွဲတာလို့သိရတယ်။ စခများ(စစ်ကောင်စီတပ်သားများ)ပစ်ခဲ့လို့ မကွဲတဲ့ဗုံးသီးကို သွားရိုက်ရာကနေ ပေါက်ကွဲပြီး အသက်ဆုံးရှုံးသွားတာ”ဟု ရွှေဘိုခရိုင် တပ်ရင်း- ၂၅ တန့်ဆည်(ပကဖ)အဖွဲ့ တာဝန်ရှိသူက ပြောသည်။
အခင်းဖြစ်ပွားရာနေရာသည် စစ်အုပ်စုနှင့် ဒေသကာကွယ်ရေးတပ်ဖွဲ့များ ထိတွေ့တိုက်ပွဲဖြစ်ပွားခဲ့ဖူးပြီး ပေါက်ကွဲမှုမရှိသေးသည့် ဗုံးသီးများ မကြာခဏ တွေ့ရှိရသည်ဟု ဒေသခံတို့ကဆိုသည်။
ထို့ကြောင့် ပြည်သူများအနေဖြင့် မပေါက်ကွဲသေးသည့် လက်နက်ခဲယမ်းများတွေ့ရှိပါက ပြည်သူ့ကာကွယ်ရေးအဖွဲ့များသို့ ချက်ချင်းအကြောင်းကြားကြရန်၊ ကိုင်တွယ်ယူဆောင်ခြင်းများ၊ စမ်းသပ်ပစ်ပေါက်ခြင်းများ မပြုလုပ်ကြရန် ဒေသကာကွယ်ရေးအဖွဲ့များက သတိပေးထားသည်။
တန့်ဆည်မြို့နယ်အတွင်း စစ်ကောင်စီတပ်နှင့် ဒေသကာကွယ်ရေးအဖွဲ့များ ဧပြီ ၁၉ ရက်က တဆယ်ကျဲကျေးရွာအနီးတွင် ထိတွေ့ပစ်ခတ်မှုများဖြစ်ပွားခဲ့ပြီး စစ်အုပ်စုအထိအခိုက်ရှိခဲ့သည်။ ထို့နောက် ဧပြီလ ၂၀ ရက်နေ့တွင် စစ်အုပ်စုက တဆယ်ကျဲကျေးရွာရှိ လူနေအိမ် ၁၃ လုံးကို မီးရှို့ဖျက်ဆီးသွားခဲ့သည်။
