KNLA တပ်မဟာ(၅)က သိမ်းပိုက်ထားသည့် ထိုင်း-မြန်မာနယ်စပ် သံလွင်မြစ်အနီးရှိ မယ်ခါးထာတပ်စခန်းကို ပြန်လည်ရယူရန် စစ်ကောင်စီတပ်က အပြင်းအထန် ထိုးစစ်ဆင်တိုက်ခိုက်နေကြောင်း ကေအဲန်ယူ-တပ်မဟာ(၅) သတင်းရင်းမြစ်များက ပြောသည်။
ပြီးခဲ့သည့် မတ်လ(၂၈)ရက်တွင် ကေအဲန်ယူ-မူတြော်(ဖာပွန်)ခရိုင် တပ်မဟာ(၅)နယ်မြေအတွင်းရှိ စစ်ကောင်စီတပ်အတွက် အရေးပါသည့် မယ်ခါးထာတပ်စခန်းကို KNLA တပ်မဟာ(၅)ပူးပေါင်းအဖွဲ့က ဝင်ရောက်တိုက်ခိုက်သိမ်းခဲ့သည်။ အဆိုပါမယ်ခါးထာတပ်စခန်းကို ပြန်လည်သိမ်းပိုက်ရရှိနိုင်ရေး ဧပြီလပိုင်းတွင် စစ်ကောင်စီတပ်က မြေပြင်နှင့် ဝေဟင်ကနေပါ အပြင်းအထန် ပြန်လည်ထိုးစစ်ဆင်တိုက်ခိုက်နေခြင်းဖြစ်သည်။
မယ်ခါးထာတပ်စခန်းပြန်ရရေးအတွက် လေကြောင်းပစ်ကူအသုံးပြုပြီးတိုက်ခိုက်နေသလို မြေပြင်မှတစ်ဆင့် အင်အားအများအပြားဖြင့် အပြင်းအထန် ထိုးစစ်ဆင်တိုက်ခိုက်နေသော်လည်း KNLA တပ်မဟာ(၅)တပ်ဖွဲ့၏ ပြန်လည်တုံ့ပြန်တိုက်ခိုက်မှုများကြောင့် စစ်ကောင်စီဘက်က အထိနာခဲ့ကြောင်း တပ်မဟာ(၅)သတင်းရင်းမြစ်တစ်ဦးထံမှ သိရသည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
“စစ်ကောင်စီစစ်ကြောင်း အင်အား(၁၅၀)ခန့် စခန်းကုန်းဟောင်းပေါ်တက်မလို့ မိုင်းထိ၊ ဒရုန်းနဲ့ ဗုံးကြဲခံရ၊ RPG 7(လက်နက်ကြီး)နဲ့ အထုခံရ၊ ရက်များလာတော့ ရိက္ခာလည်းပြတ် လူနာကိုလည်း ဆေးမကုပဲ ပစ်ထားတယ်” ဟု တပ်မဟာ(၅)သတင်းရင်းမြစ်တစ်ဦးက ပြောသည်။
မယ်ခါးထာ စခန်းကို ယာယီပြန်လည်ရရှိခဲ့သော်လည်း တိုက်ပွဲအတွင်း အထိအခိုက်အကျအဆုံးများသောကြောင့် ပြန်လည်ဆုတ်ခွာသွားရကြောင်း ၊ ထိခိုက်သေဆုံးမှုအရေအတွက်ကို မသိရသေးသော်လည်း စခန်းကို ပြန်ရရန် စစ်ကောင်စီအတွက် ခက်ခဲနိုင်ကြောင်း တပ်မဟာ(၅)ပြောခွင့်ရသူ ဗိုလ်မှူးကြီးစောကလယ်ဒို၏ ပြောဆိုချက်ကို ကရင်သတင်းစဉ်ဌာန(KIC)တွင် ရေးသားဖော်ပြထားသည်။
စစ်ကောင်စီ၏ မယ်ခါးထာတပ်စခန်းကို ပြီးခဲ့သည့် မတ်လ(၂၈)ရက်နေ့တွင် ကရင်အမျိုးသားလွတ်မြောက်ရေးတပ်မတော်(KNLA)တပ်မဟာ(၅) ပူးပေါင်းတပ်ဖွဲ့မှ ဝင်ရောက်တိုက်ခိုက်ပြီး နာရီဝက်ကျော်အကြာ စခန်းကို သိမ်းပိုက်ရရှိနိုင်ခဲ့ကာ စစ်ကောင်စီဘက်မှ (၁၆)ဦး သေဆုံးနှင့် (၇)ဦး ဒဏ်ရာရရှိခဲ့သလို လက်နက်ခဲယမ်းအမြောက်အများကိုလည်း သိမ်းဆည်းရရှိခဲ့သည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)